വിസ തട്ടിപ്പ്‌: ബിജെപി നേതാവിനെതിരെ കേസെടുത്തു

കോലഞ്ചേരി: വിസ തട്ടിപ്പ്‌ നടത്തി കോടികൾ തട്ടിയ ബിജെപി നേതാവിനും സഹായിക്കുമെതിരെ പൊലീസ്‌ കേസെടുത്തു. എറണാകുളം ഈസ്റ്റ് ജില്ലാ വൈസ് പ്രസിഡന്റ് മനോജ് മനക്കേക്കര, കൊല്ലം സ്വദേശിനി സിനി എന്ന നന്ദനവർമ എന്നിവർക്കെതിരെയാണ്‌ കുന്നത്തുനാട് പൊലീസ് കേസെടുത്തത്‌. ദുബായിലെ എ വൺ റൈസ് കമ്പനിയിൽ ജോലി വാഗ്ദാനം ചെയ്ത് കമ്പളിപ്പിക്കപ്പെട്ട വെമ്പിള്ളി മലയാരിപ്പറമ്പിൽ രഞ്ജിത് കൃഷ്ണന്റെ പരാതിയിലാണ്‌ കേസ്‌. തട്ടിപ്പിൽ നിരവധി പേർ കുടുങ്ങിയതായാണ്‌ സൂചന.

ദുബായിലെ കമ്പനി ഒരു കേന്ദ്രമന്ത്രിയുടെ ബന്ധുവിന്റെയാണെന്നും ഇവരുമായി ബന്ധമുള്ള ആളാണ് സിനി എന്നുമാണ് പരാതിക്കാരന് പരിചയപ്പെടുത്തിയത്. ഒരുവഷംമുമ്പ് തുടങ്ങിയ തട്ടിപ്പിൽ മനോജ് നേരിട്ട് ഇടപെട്ടാണ് പലരിൽനിന്നും പണം വാങ്ങിയത്. പണം നഷ്ടപ്പെട്ടവരിലധികവും ബിജെപി പ്രവർത്തകരായതിനാൽ ഒതുക്കിത്തീർക്കാൻ നിരവധി ശ്രമം നടന്നിരുന്നു. ജില്ലാ നേതൃത്വത്തിനടക്കം ഇവർ പരാതി നൽകിയെങ്കിലും ഒരു നടപടിയുമുണ്ടായില്ല. നിരവധിപ്പേരുടെ പണം നഷ്ടപ്പെട്ടിട്ടുണ്ട്. 75,000 മുതൽ രണ്ടുലക്ഷം രൂപവരെയാണ് പലരിൽനിന്നും തട്ടിയത്‌.

മനോജിന്റെ നിർദേശമനുസരിച്ച് സിനിയുടെ കൊല്ലം തൃക്കോവിൽവട്ടത്തുള്ള കനറാ ബാങ്ക് അക്കൗണ്ടിലേക്കാണ് പരാതിക്കാരനായ രഞ്ജിത് കൃഷ്ണൻ രണ്ടുലക്ഷം രൂപ നൽകിയത്. പിതാവിന്റെ എൽഐസി നിക്ഷേപത്തിലെ പണമാണ് തട്ടിയെടുത്തത്. മാറമ്പിള്ളി സ്വദേശിയടക്കം പൊലീസിൽ മൊഴി നൽകാൻ തയ്യാറെടുക്കുകയാണെന്നാണ് വിവരം. പണം നഷ്ടപ്പെട്ടവർ റൂറൽ എസ്പിക്ക് നൽകിയ പരാതി അതത് സ്റ്റേഷനുകളിലേക്ക് കൈമാറിയിട്ടുണ്ട്. കഴിഞ്ഞ ദിവസമാണ് ജില്ലാ കമ്മിറ്റി അംഗമായിരുന്ന മനോജിനെ ജില്ലാ വൈസ് പ്രസിഡന്റായി നാമനിർദേശം ചെയ്തത്.