വിജിലൻസ് മിന്നൽ പരിശോധനയിൽ കണക്കിൽപ്പെടാത്ത പണം പിടിച്ചെടുത്തു

കോഴിക്കോട്: കോഴിക്കോട് നന്മണ്ട സബ് ആർടി ഓഫീസിൽ വിജിലൻസ് നടത്തിയ മിന്നൽ പരിശോധനയിൽ ഏജന്റിൽ നിന്നും കണക്കിൽപ്പെടാത്ത തുക പിടിച്ചെടുത്തു.കോഴിക്കോട് നന്മണ്ട സബ് ആർടി ഓഫീസിലെ ഉദ്യോഗസ്ഥർ ഡ്രൈവിങ് ടെസ്റ്റ്, ഫിറ്റ്‌നെസ് ടെസ്റ്റ്, മറ്റ് ഓഫീസ് സേവനങ്ങൾ എന്നിവയ്ക്കായി വരുന്ന ആളുകളിൽ നിന്നും ഏജന്റുമാർ മുഖേന കൈക്കൂലി വാങ്ങുന്നതായും വൈകുന്നേരം 5 മണി കഴിഞ്ഞുള്ള സമയങ്ങളിൽ ജോയിൻ്റ് ആർ.ടി.ഓ യുടെ ഓഫീസ് മുറിയിൽ കണക്കും പണവുമായി ഏജൻ്റമാർ എത്തി പണം കൈമാറുന്നതായും വിജിലൻസിന് വിവരം ലഭിച്ചിരുന്നു.

ഈ വിവരത്തിൻ്റെ അടിസ്ഥാനത്തിൽ വിജിലൻസ് ഇന്ന് നന്മണ്ട സബ് ആർ.ടി ഓഫീസിൽ മിന്നൽ പരിശോധന നടത്തി. വൈകിട്ട് 05.20 ന് ആരംഭിച്ച മിന്നൽ പരിശോധന വൈകിയും തുടർന്നു. പരിശോധനയിൽ ജോയിൻ്റ് ആർ.ടി.ഓ യുടെ ഓഫീസിലുണ്ടായിരുന്ന ഒരു ഏജന്റിൻ്റെ കൈവശം കാണപ്പെട്ട ബാഗിൽ നിന്നും കണക്കിൽപ്പെടാത്ത 65,850 രൂപ വിജിലൻസ് പിടിച്ചെടുത്തു.

പൊതുജനങ്ങളുടെ ശ്രദ്ധയിൽ അഴിമതി സംബന്ധിച്ച വിവരങ്ങൾ ലഭിക്കുകയാണെങ്കിൽ വിജിലൻസിൻ്റെ ടോൾ ഫ്രീ നമ്പരായ 1064 എന്ന നമ്പരിലോ 8592900900 എന്ന നമ്പരിലോ വാട്ട്സ്ആപ്പ് നമ്പരായ 9447789100 എന്ന നമ്പരിലോ അറിയിക്കണമെന്ന് വിജിലൻസ് ഡയറക്ടർ മനോജ് എബ്രഹാം ഐ.പി.എസ് അഭ്യർത്ഥിച്ചു.