ലോക്ഭവന്റെ കലണ്ടറിൽ ബ്രിട്ടീഷുകാർക്ക് മാപ്പെഴുതിക്കൊടുത്ത സവർക്കറും; ഇടംപിടിച്ചത് സ്വാതന്ത്ര്യ സമരസേനാനികൾക്കൊപ്പം

തിരുവനന്തപുരം: ലോക്ഭവൻ കേരള പുറത്തിറക്കിയ പുതുവർഷ കലണ്ടറിൽ ഇടംപിടിച്ച് ഹിന്ദുമഹാസഭാ നേതാവ് വി ഡി സവർക്കറുടെ ചിത്രവും. ബ്രിട്ടീഷുകാർക്ക്‌ അടിമപ്പണി ചെയ്യാം എന്നെഴുതിക്കൊടുത്ത്‌ ആൻഡമാൻ ജയിലിൽനിന്ന്‌ മോചിതനാകാൻ ശ്രമിച്ച സവർക്കറെ, രാജ്യത്തിന്റെ സ്വാതന്ത്ര്യ സമരസേനാനികൾക്കൊപ്പമാണ് കലണ്ടറിൽ ഉൾപ്പെടുത്തിയിരിക്കുന്നത്. കേന്ദ്രമന്ത്രി സുരേഷ് ​ഗോപി ​ഗവർണർ രാജേന്ദ്ര ആർലേക്കറിൽനിന്ന് കലണ്ടർ ഏറ്റുവാങ്ങി.

ഇത് ആദ്യമായാണ് ലോക്ഭവൻ ഒരു കലണ്ടർ പുറത്തിറക്കുന്നത്. സ്വാതന്ത്ര്യ സമര സേനാനികളുടെയും സാംസ്കാരിക നായകരുടെയും ചിത്രങ്ങൾ കലണ്ടറിലുണ്ട്. അതിനൊപ്പമാണ് ഇന്ത്യാ രൂപീകരണത്തിന് എതിരെനിന്ന സവർക്കറെയും ചേർത്തുവെച്ചിരിക്കുന്നത്. ലോക്ഭവനെ രാഷ്ട്രീയവേദിയാക്കാനുള്ള ​ബിജെപിയുടെ ശ്രമങ്ങളുടെ തുടർച്ചകൂടിയാണ് ഈ നടപടി.

ബ്രിട്ടീഷുകാരോട്‌ പലവട്ടം മാപ്പുപറഞ്ഞ്‌ സ്വാതന്ത്ര്യസമരത്തെ ഒറ്റുകൊടുക്കുകയും ഗാന്ധിവധക്കേസിൽ പ്രതിചേർക്കപ്പെടുകയുംചെയ്‌ത ഹിന്ദുത്വ തീവ്രവാദിയായ സവർക്കറെ മുൻപും പലവേദികളിലും ബിജെപി നേതാക്കൾ ആദരിച്ചിട്ടുണ്ട്.