'കേരളം മാതൃക'; സ്‌കൂൾ കായികമേളയെ അഭിനന്ദിച്ച് കേന്ദ്ര വിദ്യാഭ്യാസ മന്ത്രാലയം

തിരുവനന്തപുരം: ഒളിമ്പിക്‌സ്‌ മാതൃകയിൽ കൊച്ചിയിൽ സംഘടിപ്പിക്കപ്പെട്ട കേരള സ്‌കൂൾ കായികമേളയെ അഭിനന്ദിച്ച് കേന്ദ്ര വിദ്യാഭ്യാസ മന്ത്രാലയം. സവിശേഷ പരിഗണന അർഹിക്കുന്ന കുട്ടികളെ കൂടി പങ്കെടുപ്പിച്ച് ഇൻക്ലൂസീവ് സ്പോർട്സ് ഉൾപ്പെടെ കായിക മേള നടത്തിയതിനെയാണ് കേന്ദ്രം മാതൃകയാക്കണമെന്ന് നിർദ്ദേശിച്ചത്.

സമഗ്ര വിദ്യാഭ്യാസത്തിലും സാമൂഹിക പുരോഗതിയിലും കേരളം എപ്പോഴും മുൻപന്തിയിലാണെന്ന് മന്ത്രി വി ശിവൻകുട്ടി പറഞ്ഞു. ഒളിമ്പിക്സ്‌ മാതൃകയിലുള്ള ചട്ടക്കൂട് സ്വീകരിക്കുന്നതിലൂടെയും ഭിന്നശേഷി കുട്ടികളുടെ പങ്കാളിത്തം ഉറപ്പാക്കുന്നതിലൂടെയും വിദ്യാഭ്യാസത്തിലും കായികരംഗത്തും തുല്യത വളർത്തുകയാണ് കേരളം.

കേരളം നടത്തിയ പരിപാടിയുടെ പ്രാധാന്യത്തെ കൂടുതൽ അടിവരയിടുന്നതാണ് കേന്ദ്ര വിദ്യാഭ്യാസ മന്ത്രാലയത്തിന്റെ അംഗീകാരം . ജാതി, മതം, വംശം അല്ലെങ്കിൽ കഴിവ് എന്നിവ പരിഗണിക്കാതെ എല്ലാവർക്കും വിദ്യാഭ്യാസവും പാഠ്യേതര അവസരങ്ങളും പ്രാപ്യമാണെന്ന് ഉറപ്പാക്കുക എന്ന വിശാലമായ കാഴ്ചപ്പാടാണ് കേരളത്തിനുള്ളത്. കൂടുതൽ സമഗ്രമായ ഒരു സമൂഹം കെട്ടിപ്പടുക്കുന്നതിലേക്കുള്ള കേരളത്തിന്റെ തുടർച്ചയായ പുരോഗതിയുടെ തിളക്കമാർന്ന ഉദാഹരണമായി ഇത് നിലകൊള്ളുന്നു. മറ്റ് സംസ്ഥാനങ്ങൾക്ക് അനുകരിക്കാൻ ഒരു മാതൃക കൂടി കേരളം സൃഷ്ടിക്കുന്നെന്നും അദ്ദേഹം ഫെയ്സ്ബുക്കിൽ കുറിച്ചു.