print edition തടസ്സമില്ലാതെ സുഗമയാത്ര രണ്ടാഴ്ചയിൽ 12 ലക്ഷം തീർഥാടകർ

ശബരിമല സന്നിധാനത്ത് ശനിയാഴ്ച അനുഭവപ്പെട്ട തിരക്ക്

സ്വന്തം ലേഖകൻ
Published on Nov 30, 2025, 12:32 AM | 1 min read
ശബരിമല: മണ്ഡലകാലം തുടങ്ങി ശബരിമല തീർഥാടനം രണ്ടാഴ്ച പിന്നിടുമ്പോൾ ദർശനം നടത്തിയ തീർഥാടകരുടെ എണ്ണം 12 ലക്ഷത്തിലേക്ക് അടുക്കുന്നു. ശനി വൈകിട്ട് ആറുവരെയുള്ള കണക്ക് പ്രകാരം 11, 71, 450 തീര്ഥാടകർ ദർശനം നടത്തി. വെർച്വൽ ക്യൂ, സ്പോട്ട് ബുക്കിങ് ഉൾപ്പെടെയുള്ള കണക്കാണിത്. ശനി രാവിലെ മുതൽ മൂടിക്കെട്ടിയ അന്തരീക്ഷമായിരുന്നു സന്നിധാനത്ത്. ഇതിനാൽ പകൽസമയങ്ങളിൽ തിരക്കൊഴിഞ്ഞതിനാൽ തീർഥാടകർക്ക് സുഗമദർശനത്തിനുള്ള സൗകര്യം ലഭ്യമായി.
നടപ്പന്തലുകളിലും തീർഥാടകരുടെ നീണ്ട നിരയുണ്ടായില്ല. വൈകിട്ടോടെയാണ് തിരക്കേറിയത്. ശബരിമല നടതുറന്നശേഷമുള്ള ഏറ്റവും വലിയ തിരക്ക് കഴിഞ്ഞ തിങ്കൾ, ചൊവ്വ ദിവസങ്ങളിലാണ് അനുഭവപ്പെട്ടത്. തിങ്കളാഴ്ച 1,17, 369 തീർഥാടകർ മല ചവിട്ടിയപ്പോൾ ചൊവ്വാഴ്ച 1,01,237 പേരും ദർശനം നടത്തി. സർക്കാരും ദേവസ്വം ബോർഡും കൃത്യമായ ക്രമീകരണങ്ങള് ഒരുക്കിയിരിക്കുന്നതിനാല് തിരക്കായാൽ പോലും സുഖദര്ശനം ലഭിക്കുന്നതിന്റെ സന്തോഷത്തോടെയാണ് തീര്ഥാടകര് മലയിറങ്ങുന്നത്. പമ്പയില്നിന്ന് സന്നിധാനത്തേക്ക് പുറപ്പെട്ടാല് അധികനേരം കാത്തുനില്ക്കാതെ തന്നെ എല്ലാവര്ക്കും ദര്ശനം ഉറപ്പാക്കാനാകുന്നുണ്ട്.









0 comments