print edition നിയമസഭാ തെരഞ്ഞെടുപ്പിലും 
മതരാഷ്‌ട്രവാദികൾക്ക്‌ സീറ്റ്‌ വാഗ്‌ദാനം

കോഴിക്കോട്‌

നിയമസഭാ തെരഞ്ഞെടുപ്പിലും മതരാഷ്‌ട്രവാദികളായ ജമാഅത്തെ ഇസ്ലാമിയുടെ വെൽഫെയർ പാർടിക്ക്‌ സീറ്റ്‌ വാഗ്‌ദാനം നൽകി കോൺഗ്രസ്‌. വിജയിക്കുന്ന മണ്ഡലം നൽകുമെന്നാണ്‌ വാഗ്‌ദാനം. അസോസിയറ്റ്‌ അംഗത്വം നൽകി ഘടകകക്ഷി പരിഗണനയും ഉറപ്പാക്കിയിട്ടുണ്ട്‌. ഇതിന്‌ ലീഗിന്റെ പിന്തുണയുമുണ്ട്‌. തദ്ദേശ തെരഞ്ഞെടുപ്പിൽ കേരളാകോൺഗ്രസ്‌ ജോസഫ്‌ വിഭാഗത്തെയടക്കം അവഗണിച്ച്‌ ജമാഅത്തെയുടെ പാർടിക്ക്‌ മുഖ്യപരിഗണന നൽകുന്നതിനൊപ്പമാണ്‌ ഘടകകക്ഷി, സീറ്റ്‌ വാഗ്‌ദാനങ്ങൾ.

തെരഞ്ഞെടുപ്പുകളിൽ 10 വർഷമായി പിന്തുണയ്‌ക്കുന്ന ജമാഅത്തെ ഇസ്ലാമിയെ പുറത്തുനിർത്തേണ്ടെന്നന്ന്‌ ലീഗിന്റെ ചില ഉന്നതനേതാക്കളാണ്‌ ആദ്യം അഭിപ്രായപ്പെട്ടത്‌. കോൺഗ്രസിലെ ഒരു വിഭാഗവും ഇതിനെ പിന്തുണക്കുന്നു. പഞ്ചായത്ത്‌ തെരഞ്ഞെടുപ്പിനുശേഷം പ്രവേശനം പരിഗണിക്കും. പി വി അൻവറിനെ ചേർക്കുന്നതിനൊപ്പമാകും ജമാഅത്തെയുടെ വെൽഫെയറിനെയും പരിഗണിക്കുക. നിയമസഭയ്‌ക്ക്‌ മുന്പ്‌ വ്യക്തമായ ‘അക്കോമഡേഷൻ’ എന്ന സൂചനയാണ്‌ കൈമാറിയത്‌.

മലപ്പുറത്ത്‌ ഒരു സീറ്റ്‌ നൽകുന്നതിൽ ലീഗിന്‌ എതിർപ്പില്ല. കോഴിക്കോട്‌, പാലക്കാട്‌ ജില്ലകളിൽ പൊതുസ്വതന്ത്രരെന്ന രൂപത്തിലും വഴിയൊരുക്കും. യുഡിഎഫ്‌ നേതൃത്വവുമായി ചർച്ച നടന്ന കാര്യം വെൽഫെയർ നേതാക്കളടക്കം നിഷേധിച്ചിട്ടില്ല. ഇതിന്റെ റിഹേഴ്‌സലാണ്‌ പഞ്ചായത്ത്‌ തെരഞ്ഞെടുപ്പിലെ ജമാഅത്തെ ഇസ്ലാമി സഖ്യം. യുഡിഎഫിന്‌ പുറത്ത്‌ വെൽഫെയർ പാർടി നാമമാത്ര സീറ്റുകളിലേ മത്സരിക്കുന്നുള്ളൂ. വെൽഫെയർ സ്ഥാനാർഥികളെ പാണക്കാട്‌ തങ്ങൾ പ്രഖ്യാപിച്ചതും യോജിച്ച പ്രചാരണവുമെല്ലാം ഇതിന്റെ ഭാഗമാണ്‌.

എന്നാൽ മതരാഷ്‌ട്ര വാദികളുമായുള്ള പരസ്യസഖ്യം അഖിലേന്ത്യാതലത്തിൽ കോൺഗ്രസിനെ വീണ്ടും പിന്നോട്ടടുപ്പിക്കുമെന്ന്‌ കോൺഗ്രസിലെ ഒരു വിഭാഗം കരുതുന്നു. അതിനാൽ എഐസിസി നേതൃത്വത്തിന്റെ തീരുമാനം നിർണായകമാകും. വയനാട്‌ മണ്ഡലത്തിൽ രാഹുൽ – പ്രിയങ്കമാരുടെ വിജയത്തിലടക്കം ജമാഅത്തെ ഇസ്ലാമി നൽകിയ സംഭാവന കണക്കിലെടുത്ത്‌ ഹൈക്കമാൻഡ്‌ കണ്ണടക്കുമെന്ന ആത്മവിശ്വാസത്തിലാണ്‌ നിയമസഭ തെരഞ്ഞെടുപ്പിലേക്കുള്ള ഇ‍ൗ വാഗ്‌ദാനങ്ങൾ.