പൊതുസ്ഥലത്ത് മാലിന്യം തള്ളൽ; വാട്സ്ആപ്പ് പരാതികൾ വഴി ഈടാക്കിയത് 30.67 ലക്ഷം രൂപ

തിരുവനന്തപുരം: പൊതുസ്ഥലത്ത്‌ മാലിന്യം തള്ളിയതുമായി ബന്ധപ്പെട്ട് തദ്ദേശവകുപ്പ് വാട്സാപ്പിലൂടെ ലഭിച്ച പരാതികൾ വഴി ഈടാക്കിയത് 30.67 ലക്ഷം രൂപ. ഇതിൽ 14,50,930 രൂപ വകുപ്പ് ഇതിനോടകം തന്നെ ഈടാക്കി.

മാലിന്യം വലിച്ചെറിയുന്നതുമായി ബന്ധപ്പെട്ട പരാതികൾ അറിയിക്കാനുള്ള ‘സിംഗിൾ വാട്സാപ്‌’ സംവിധാനം നിലവിൽ വന്നശേഷം സംസ്ഥാനത്തെ വിവിധ ഭാഗങ്ങളിൽ നിന്നായി 7921 പരാതികളാണ് ലഭിച്ചത്. അതിൽ കുറ്റക്കാരെ തിരിച്ചറിയാനുള്ള വിവരങ്ങൾ അടങ്ങിയ 4772 പരാതികൾ ബന്ധപ്പെട്ട തദ്ദേശ സ്ഥാപനങ്ങൾ സ്വീകരിച്ച്‌ 3905 എണ്ണം തീർപ്പാക്കി. നിയമലംഘനം നടത്തിയവരിൽ നിന്ന്‌ ഈടാക്കിയ പിഴയുടെ നിശ്ചിത ശതമാനം പരാതി സമർപ്പിച്ചവർക്കുള്ള പാരിതോഷികമായും നൽകും.

ഇതിനകം 37 പേർക്കുള്ള പാരിതോഷികമായി 21,750 രൂപ പ്രഖ്യാപിച്ചിട്ടുണ്ട്. ഇതിനുപുറമേ നിയമലംഘനം നടത്തിയ 26പേരുടെ മേൽ പ്രോസിക്യൂഷൻ നടപടികളും പുരോഗമിക്കുകയാണ്. മാലിന്യ സംസ്കരണവുമായി ബന്ധപ്പെട്ട നിയമലംഘനങ്ങൾ തദ്ദേശ സ്ഥാപനത്തിന്റെ ശ്രദ്ധയിൽപ്പെടുത്തുന്നതിന്റെ ഭാഗമായാണ് സിംഗിൾ വാട്സാപ്‌ സംവിധാനം കൊണ്ടുവന്നത്. 9446700800 എന്ന നമ്പറിലാണ്‌ ഇതിനായി വിളിക്കേണ്ടത്‌. പൊതുഇടങ്ങളിലും ജലാശയങ്ങളിലും മാലിന്യം വലിച്ചെറിയുന്നവരുടെ മുഖമോ, വാഹന നമ്പരോ മറ്റ്‌ തിരിച്ചറിയൽ വിവരങ്ങളോ വ്യക്തമാകുംവിധം ഫോട്ടോ/വീഡിയോ പകർത്തി പൊതുജനങ്ങൾക്ക് ഈ നമ്പറിലേക്ക് അയക്കാം. തദ്ദേശസ്ഥാപനങ്ങൾ പരിശോധിച്ചതിനുശേഷം നടപടിയെടുക്കും. നിയമലംഘനം കണ്ടെത്തിയാൽ ഈടാക്കുന്ന പിഴതുകയുടെ 25 ശതമാനം (പരമാവധി 2500- രൂപ വരെ) പരാതിക്കാർക്ക് ലഭ്യമാകുന്ന വിധത്തിലാണ് സംവിധാനം.