ആദ്യമായെടുത്ത ബമ്പർ, ജീവിതംതന്നെ മാറ്റി; 'സ്വപ്നത്തിൽ പോലും വിചാരിച്ചില്ല'

തുറവൂർ: മാറ്റിവച്ച നറുക്കെടുപ്പ്‌ ജീവിതം മാറ്റിയ സന്തോഷത്തിലാണ്‌ ശരത്തും കുടുംബവും. രണ്ട്‌ ദിനരാത്രങ്ങൾ അടക്കിവച്ച സന്തോഷം അണപൊട്ടിയ നിമിഷങ്ങളായിരുന്നു തിങ്കൾ പകൽ തൈക്കാട്ടുശേരി എംഡി യുപി സ്കൂളിന് സമീപത്തെ ശരത്തിന്റെ വീട്ടിൽ. തിരുവോണം ബമ്പർ നറുക്കെടുപ്പ്‌ മാറ്റിവയ്‌ക്കാനുള്ള സർക്കാർ തീരുമാനം നെടുംചിറ വീട്ടിലേക്ക്‌ എത്തിച്ചത്‌ സംസ്ഥാന ഭാഗ്യക്കുറിയുടെ ചരിത്രത്തിലെ ഏറ്റവും വലിയ സമ്മാനം. ‘ആദ്യം മടിച്ചുനിന്നതാണ്‌. നറുക്കെടുപ്പ്‌ മാറ്റിവച്ചതായി അറിഞ്ഞതോടെയാണ്‌ ബമ്പർ എടുക്കാൻ ശരത്‌ തീരുമാനിച്ചത്‌. ജീവിതത്തിൽ ആദ്യമായി എടുത്ത ബമ്പർ ടിക്കറ്റ്‌. അതുജീവിതംതന്നെ മാറ്റി. ആറുമാസം പ്രായമുള്ള മകൻ ആഗ്നേയ് കൃഷ്ണ കൊണ്ടുവന്ന ഭാഗ്യമാണ്’– ദേശാഭിമാനിയോട്‌ ശരത് പറഞ്ഞു.

ശരത്തിന്റെയും സഹോദരൻ രഞ്ജിത്തിന്റെയും ചെറിയ വരുമാനത്തിലാണ്‌ കുടുംബത്തിന്റെ ജീവിതം. സോഡാ നിർമാണവും ചെറിയ കൃഷിയുമായിരുന്നു ആദ്യവരുമാനം. ഡിഗ്രി പൂർത്തിയാക്കിയ ശേഷം നെട്ടൂരിലെ സ്വകാര്യ സ്ഥാപനത്തിൽ ജോലിയിൽ പ്രവേശിച്ചു. 12 വർഷമായി ഇവിടെ ജീവനക്കാരനാണ്‌. ആറ്‌ വർഷം മുമ്പായിരുന്നു അപർണയുമായുള്ള വിവാഹം. വർഷങ്ങളുടെ കാത്തിരിപ്പിനൊടുവിൽ ആറ്‌ മാസം മുമ്പാണ് മകൻ ജനിക്കുന്നത്. വീട് നിർമാണത്തിനും വിവാഹത്തിനുമായി ബാങ്കിൽ നിന്നെടുത്ത വായ്പകൾ തിരിച്ചടയ്‌ക്കാൻ പ്രയാസപ്പെട്ട് നിൽക്കുന്ന സമയത്താണ് ബമ്പർ ലോട്ടറി അടിച്ചത്.

സ്ഥിരമായി ലോട്ടറി എടുക്കുന്ന ശീലം ശരത്തിനില്ലായിരുന്നു. ജോലി സ്ഥലത്തേക്കുള്ള യാത്രക്കിടയിൽ വിൽപനക്കാരെ സഹായിക്കാൻ വേണ്ടി ഒരെണ്ണം എടുക്കും. ‘നറുക്കെടുപ്പ്‌ മാറ്റിയതാണ്‌ ബമ്പറെടുക്കാനുള്ള കാരണം. ടിക്കറ്റിന്റെ ചിത്രം ഫോണിൽ പകർത്തി ടിക്കറ്റ്‌ ഭാര്യയെ സൂക്ഷിക്കാൻ ഏൽപ്പിച്ചു. അത് 38–ാം -വയസ്സിൽ ജീവിതം മാറ്റിമറിക്കാനുള്ളതാണെന്ന് സ്വപ്നത്തിൽ പോലും വിചാരിച്ചിരുന്നില്ല.’– ജീവിതം മാറുന്നതിന്റെ സന്തോഷം ശരത്തിന്റെ വാക്കുകളിൽ. ചരക്കുസേവന നികുതിയിൽ വന്ന മാറ്റം, മഴ എന്നീ കാരണങ്ങളാൽ ടിക്കറ്റുകള്‍ പൂര്‍ണമായും വിറ്റഴിഞ്ഞില്ലെന്നും നറുക്കെടുപ്പ് നീട്ടി വയ്ക്കണമെന്നുമുള്ള ഏജന്റുമാരുടെയും വില്‍പ്പനക്കാരുടെയും അഭ്യർഥനയെ തുടർന്നാണ്‌, സെപ്‌തംബർ 27ന്‌ നടത്താനിരുന്ന നറുക്കെടുപ്പ്‌ ഒക്‌ടോബർ നാലിലേക്ക്‌ സംസ്ഥാന സര്‍ക്കാർ മാറ്റിയത്‌.