സത്യം മറയ്ക്കാനാകില്ല 
കണക്കുകള്‍ മറുപടി പറയും

തിരുവനന്തപുരം : ആരോഗ്യമേഖലയ്ക്കെതിരെ വ്യാജ വാര്‍ത്ത ചമയ്ക്കുന്ന മാധ്യമങ്ങള്‍ക്ക്‌ യഥാര്‍ഥ കണക്കുകൾ മറുപടി പറയും. 2013–--14 മുതൽ 2024–--25 വരെ തിരുവനന്തപുരം മെഡിക്കൽ കോളേജിൽ സൗജന്യ ചികിത്സ ലഭ്യമായവരുടെ എണ്ണവും സർക്കാർ നൽകിയ തുകകളും മന്ത്രി വീണാ ജോര്‍ജ് ഫെയ്സ് ബുക്കില്‍ പങ്കുവച്ചിരുന്നു. യുഡിഎഫ്‌ സർക്കാർ ഭരിക്കുന്ന 2013–- 14 കാലത്ത്‌ 23664 പേര്‍ മാത്രമാണ് തിരുവനന്തപുരം മെഡിക്കൽ കോളേജ്‌ ആശുപത്രിയിൽ ചികിത്സയ്‌ക്ക്‌ എത്തിയത്‌. 10.93 കോടി രൂപയാണ്‌ അന്ന്‌ സൗജന്യ ചികിത്സയ്ക്കായി നൽകിയത്‌. എന്നാൽ, ഒന്നാം പിണറായി സർക്കാരിന്റെ കാലത്ത്‌ 2019–-20ൽ 38028 പേർ ആശുപത്രിയിലെത്തി. 42.22 കോടി രൂപ അനുവദിച്ചു. ഒടുവിലത്തെ കണക്ക് പ്രകാരം 2024-–-25ൽ 41743 പേർക്ക്‌ ആശുപത്രി ആശ്രയമേകി. ഈ വര്‍ഷം 87.39 കോടിയാണ് സൗജന്യ ചികിത്സയ്ക്കായി അനുവദിച്ചത്.

യുഡിഎഫ് സര്‍ക്കാരിന്റെ കാലത്ത് സാധാരണക്കാർക്ക്‌ സ്വകാര്യ ആശുപത്രികളെയാണ് ആശ്രയിക്കേണ്ടിവന്നത്. അടിസ്ഥാന സൗകര്യങ്ങളുടെ അഭാവവും ഡോക്ടര്‍മാരുടെ കുറവും സ്വകാര്യ മേഖലയിലേക്ക് ജനങ്ങളെ തള്ളിവിട്ടു. എല്‍ഡിഎഫ് കാലത്ത് സര്‍ക്കാര്‍ ആശുപത്രികളെത്തേടി ഇതരസംസ്ഥാനങ്ങളിൽനിന്നുപോലും രോഗികളെത്തി. ഇതോടെയാണ് സൗജന്യ ചികിത്സയ്ക്കായുള്ള തുക എട്ടിരട്ടിയോളം വര്‍ധിപ്പിച്ചത്.

സംസ്ഥാനത്തെ മെഡിക്കൽ കോളേജുകളിൽ പ്രതിദിനം ശരാശരി 4000പേർ ഒപികളിലെത്തുന്നുണ്ട്‌.