print edition ഓർക്കണം, ക്രൈസ്‌തവവേട്ട; വോട്ടർമാരോട്‌ കത്തോലിക്ക സഭ

തൃശൂർ: പോളിങ്ബൂത്തിലേക്ക്‌ പോകുന്പോൾ രാജ്യത്താകെ ക്രൈസ്തവർക്കെതിരെ നടക്കുന്ന വേട്ടയാടൽ മനസ്സിലുണ്ടാകണമെന്ന്‌ തൃശൂർ അതിരൂപത മുഖപത്രം ‘കത്തോലിക്ക സഭ’. ‘രാജ്യത്തിന്റെ വിവിധ ഭാഗങ്ങളിൽ വിശ്വാസത്തിന്റെ പേരിൽ ക്രൂശിക്കപ്പെടുന്ന ക്രൈസ്‌തവ സമൂഹത്തിന്റെ തോരാത്ത കണ്ണുനീരും ഒടുങ്ങാത്ത നിലവിളികളും നമ്മുടെ മനസ്സിൽ ഉണ്ടായിരിക്കട്ടെ’ എന്ന്‌ പാസ്‌റ്ററൽ ക‍ൗൺസിൽ സെക്രട്ടറി ജോഷി വടക്കൻ ഡിസംബർ ലക്കത്തിൽ എഴുതിയ കുറിപ്പിൽ പറയുന്നു. ഭരണഘടന ഉറപ്പുനൽകുന്ന മ‍ൗലിക അവകാശങ്ങളും ന്യൂനപക്ഷ അവകാശങ്ങളും ഹനിക്കപ്പെടുന്നതിനെതിരെ ജാഗ്രത പാലിച്ചേ മതിയാവൂ.

ക്രൈസ്‌തവർക്കെതിരെ നടക്കുന്ന പലതരം ആക്രമണങ്ങൾ ഇന്ത്യയിൽ നേരിടുന്ന വലിയ പ്രതിസന്ധിയാണെന്ന്‌ അതിരൂപത മെത്രാപോലീത്ത മാർ ആൻഡ്രൂസ്‌ താഴത്ത്‌ പേരുവച്ച്‌ എഴുതിയ മുഖപ്രസംഗത്തിൽ പറയുന്നു. ‘പല സംസ്ഥാനങ്ങളിലുമുള്ള മതപരിവർത്തന നിരോധന നിയമങ്ങളുടെ ദുരുപയോഗം ഇ‍ൗ ആക്രമണങ്ങൾക്ക്‌ ആക്കം കൂട്ടിയിട്ടുണ്ട്‌. ഭരണഘടന ഉറപ്പുനൽകുന്ന മതസ്വാതന്ത്ര്യമാണ്‌ ഹനിക്കപ്പെടുന്നത്‌. ഏതൊരു മതവിശ്വാസവും സ്വീകരിക്കാനും അനുഷ്‌ഠിക്കാനും പ്രചരിപ്പിക്കാനും സ്വാതന്ത്ര്യം നൽകുന്ന ഭരണഘടനയ്‌ക്കെതിരെയുള്ള പ്രവർത്തനങ്ങളാണ്‌ ഇപ്പോൾ പലയിടത്തും നടക്കുന്നത്‌. നിർബന്ധിത മതപരിവർത്തനത്തിന്‌ ക്രൈസ്‌തവർ എതിരാണ്‌. മതപരിവർത്തനം ആരോപിച്ച്‌ സന്യസ്തരെയും വൈദികരെയും പീഡിപ്പിക്കാമെന്ന്‌ കരുതുന്നവർ ദൂരവ്യാപക പ്രത്യാഘാതം നേരിടേണ്ടിവരും’ എന്ന്‌ മുഖപ്രസംഗത്തിൽ പറയുന്നു.