വിസ തട്ടിപ്പ് കേസിലെ പ്രതി മലപ്പുറത്ത് പിടിയിൽ

താനൂർ: വിസ തട്ടിപ്പ് കേസിലെ പ്രതി താനൂർ പൊലീസിന്റെ കസ്റ്റഡിയിൽ. കണ്ണൂർ മമ്മക്കുന്ന് വാഴയിൽ ഫലീലി(51)നെയാണ് പൊലീസ് കസ്റ്റഡിയിലെടുത്തത്. വിദേശത്ത് ജോലി വാഗ്ദാനം ചെയ്ത് വിസ നൽകാമെന്ന് പറഞ്ഞ് കബളിപ്പിച്ച് നിരവധി യുവാക്കളിൽ നിന്നായി ലക്ഷങ്ങൾ തട്ടിയെടുത്തിരുന്നു. ഈ പരാതിയുടെ അടിസ്ഥാനത്തിലാണ് നടപടി.

കണ്ണൂർ ജില്ലയിൽ സമാനമായ കേസിൽ ഉൾപ്പെട്ട് കണ്ണവം പൊലീസിന്റെ പിടിയിലായി കണ്ണൂർ സബ്ജയിൽ റിമാൻഡിൽ കഴിയുകയാണ് ഫലീൽ. നിരവധി വിവാഹം കഴിച്ച് മുങ്ങി നടക്കുന്നതിൽ ഒട്ടേറെ പരാതികൾ ഇയാൾക്കെതിരെയുണ്ട്. 2023ൽ താനൂരിൽ നിന്നും വിവാഹം കഴിച്ച ഇയാൾ താനൂർ സ്വദേശികളായ നിരവധി ആളുകളെ സമീപിച്ച് വിദേശജോലിക്കായി പണം കൈപ്പറ്റിയിരുന്നു.

ഇവരുടെ പരാതിയുടെ അടിസ്ഥാനത്തിൽ താനൂർ ഡിവൈഎസ്പി പി പ്രമോദിന്റെ മേൽനോട്ടത്തിൽ സിഐ ബിജിത്ത്, എസ്ഐമാരായ എൻ ആർ സുജിത്ത്, ഭവിത, എഎസ്ഐ അനിൽ, സിപിഒമാരായ ജ്യോതിഷ് വിബീഷ് എന്നിവരുടെ നേതൃത്വത്തിൽ അന്വേഷണം നടത്തി പ്രതിയെ കസ്റ്റഡിയിൽ വാങ്ങി തെളിവെടുപ്പ് നടത്തി.