യുഡിഎഫിലേക്ക് ഇല്ല; ചർച്ചകൾക്ക് ഒരു അടിസ്ഥാനവുമില്ലെന്ന് സ്റ്റീഫൻ ജോർജ്

കോട്ടയം: മുന്നണിമാറ്റ ചർച്ചകൾ പാടേതള്ളി കേരള കോൺ​ഗ്രസ് (എം). യുഡിഎഫിലേക്ക് പോകുമെന്ന ചർച്ചകൾക്ക് ഒരു അടിസ്ഥാനവുമില്ലെന്ന് കേരള കോൺ​ഗ്രസ് (എം) സംസ്ഥാന ജനറൽ സെക്രട്ടറി സ്റ്റീഫൻ ജോർജ് പറഞ്ഞു. തെരഞ്ഞെടുപ്പ് പരാജയമുണ്ടായാൽ മുന്നണി വിടുന്ന രീതി പാർടിക്കില്ല. കേരള കോണ്‍ഗ്രസ് എല്‍ഡിഎഫില്‍ ഉറച്ചുനില്‍ക്കുമെന്നും അദ്ദേഹം മാധ്യമങ്ങളോട് പറഞ്ഞു.

ഇടതുപക്ഷ മുന്നണിയിലേക്ക് കേരള കോൺ​ഗ്രസ് വന്നതിനുശേഷം നടന്ന നിയമസഭാ തെരഞ്ഞെടുപ്പിൽ എൽഡിഎഫിന് വലിയ വിജയമുണ്ടായി. കേരള കോൺ​ഗ്രസിന്റെ സാന്നിധ്യവും അടിത്തറയും യുഡിഎഫ് നേതാക്കൾക്ക് അപ്പോഴാണ് ബോധ്യപ്പെട്ടത്. അതിനുശേഷം പലതവണയായി കോൺ​ഗ്രസിന്റെയും മുസ്ലിംലീ​ഗിന്റെയും നേതാക്കൾ കേരള കോൺ​ഗ്രസിനെ യുഡിഎഫിലേക്ക് ക്ഷണിക്കാറുണ്ടെന്നും, ഇപ്പോഴത്തെ ചർച്ചകൾ അതിന്റെ തുടർച്ച മാത്രമാണെന്നും സ്റ്റീഫൻ ജോർജ് പറഞ്ഞു.