കാലവർഷം 27ന്‌ 
കേരള തീരംതൊടും ; 2 ജില്ലയിൽ ഇന്ന്‌ മഞ്ഞ അലർട്ട്‌

തിരുവനന്തപുരം

തെക്ക്‌പടിഞ്ഞാറൻ കാലവർഷം തെക്കൻ അറബിക്കടലിലേക്ക്‌ എത്തി. തുടർന്നുള്ള ദിവസങ്ങളിൽ ലക്ഷദ്വീപ്‌ ഭാഗത്തേക്ക്‌ നീങ്ങും. 27 ന്‌ കേരള തീരം തൊടും. അറബിക്കടലിലും ബംഗാൾ ഉൾക്കടലിലും ന്യൂനമർദ സാധ്യതയുണ്ട്‌. ബംഗാൾ ഉൾക്കടലിൽ രണ്ടു ദിവസത്തിനുള്ളിൽ രൂപം കൊള്ളുന്ന ചക്രവാതച്ചുഴി ന്യൂനമർദമായി മാറി തമിഴ്നാട് തീരത്തേക്ക് നീങ്ങും. കൊങ്കൺ തീരത്ത് അറബിക്കടലിൽ 22ന് രൂപം കൊള്ളുന്ന ന്യൂനമർദം മുംബൈ തീരത്തേക്ക് നീങ്ങി തീവ്ര ന്യൂനമർദമായേക്കും.

2 ജില്ലയിൽ ഇന്ന്‌ മഞ്ഞ അലർട്ട്‌

സംസ്ഥാനത്ത്‌ ശനി മുതൽ ശക്തമായ മഴയ്‌ക്കും തിങ്കൾ മുതൽ അതിശക്ത മഴയ്‌ക്കും സാധ്യതയെന്ന്‌ കാലാവസ്ഥ വകുപ്പ്‌. ശനി പത്തനംതിട്ട, ഇടുക്കി ജില്ലകളിലും ഞായർ പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട്‌ ജില്ലകളിലും മഞ്ഞ അലർട്ട്‌ (ശക്തമായ മഴ) പ്രഖ്യാപിച്ചു. തിങ്കൾ മലപ്പുറം, കോഴിക്കോട്, വയനാട്, കണ്ണൂർ, കാസർകോട്‌ ജില്ലകളിലും ചൊവ്വ കോഴിക്കോട്, വയനാട്, കണ്ണൂർ, കാസർകോട്‌ ജില്ലകളിലും ഓറഞ്ച്‌ അലർട്ട്‌ (അതിശക്ത മഴ) ആണ്‌. ഒറ്റപ്പെട്ട സ്ഥലങ്ങളിൽ ഇടിമിന്നലിനും ശക്തമായ കാറ്റിനും സാധ്യതയുള്ളതിനാൽ ജാഗ്രത പാലിക്കണം. കേരളം, കർണാടക, ലക്ഷദ്വീപ് തീരങ്ങളിൽ മണിക്കൂറിൽ 55 കിലോമീറ്റർ വരെയും വേഗത്തിൽ കാറ്റിനും മോശം കാലാവസ്ഥയ്‌ക്കും സാധ്യതയുള്ളതിനാൽ ഞായർ മുതൽ മീൻപിടിക്കാൻ പോകരുത്‌.