ആകാശ ഭക്ഷണശാല താൽക്കാലികമായി പൂട്ടും; നടത്തിപ്പുകാർക്കെതിരെ കേസെടുത്തു

അടിമാലി: അടിമാലി ആനച്ചാലിലെ ആകാശ ഭക്ഷണശാലയിൽ വിനോദസഞ്ചാരികൾ കുടുങ്ങിയ സംഭവത്തിൽ വെള്ളത്തൂവൽ പൊലീസ് രണ്ടുപേർക്കെതിരെ കേസെടുത്തു. സതേൺ സ്‌കൈസ് എയ്‌റോഡൈനാമിക്‌സ്‌ നടത്തിപ്പുകാരായ ആനച്ചാൽ സ്വദേശി സോജൻ തോമസ്, ഉടുമ്പന്നൂർ പുളിക്കമറയിൽ പ്രവീൺ എന്നിവർക്കെതിരെയാണ്‌ കേസെടുത്തത്‌. രണ്ട് കുട്ടികൾ ഉൾപ്പെടെ മംഗളുരു സ്വദേശികളായ നാലംഗ കുടുംബവും ജീവനക്കാരിയുമാണ് വെള്ളിയാഴ്ച ആകാശ ഭക്ഷണശാലയിൽ കുടുങ്ങിയത്. 3 മണിക്കൂർ നീണ്ട പരിശ്രമത്തിന്‌ ശേഷമാണ്‌ ഇവരെ അഗ്നിരക്ഷാസേന രക്ഷപെടുത്തിയത്.

ക്രെയിനിന്റെ ഫിറ്റ്നസ്, ഇൻഷുറൻസ് തുടങ്ങിയ രേഖകൾ പരിശോധിക്കേണ്ടതുണ്ട്. ക്രെയിനിന്റെ ഹൈഡ്രോളിക് സംവിധാനം പ്രവർത്തിക്കാതായിരുന്നു, സെൻസറിനും തകരാർ സംഭവിച്ചിട്ടുണ്ടെന്നാണ് പ്രാഥമിക വിലയിരുത്തൽ. ആവശ്യമാണെങ്കിൽ മോട്ടോർ വെഹിക്കിൾ ഡിപ്പാർട്ട്‌മെന്റ് നടപടികൾക്കും വിധേയമാക്കും- പൊലീസ് പറഞ്ഞു.

അതേസമയം ആകാശ ഭക്ഷണശാല താൽകാലികമായി പൂട്ടാൻ ജില്ലാ ഭരണകൂടത്തിന്റെ നിർദേശം. മതിയായ സുരക്ഷാസംവിധാനങ്ങൾ ഇല്ലാതെ പ്രവർത്തിച്ചതിന് നടത്തിപ്പുകാരായ സതേൺ സ്‌കൈസ് എയ്‌റോഡൈനാമിക്‌സിന് നോട്ടീസ് നൽകി. ജില്ലാ ദുരന്തനിവാരണ അതോറിറ്റി ചെയർമാൻ കൂടിയായ കലക്ടറുടെ നിർദേശപ്രകാരം തഹസിൽദാർ നടത്തിയ പരിശോധനയിൽ സ്ഥാപനത്തിന് മതിയായ രേഖകളില്ലെന്ന് കണ്ടെത്തി. തുടർന്നാണ് സ്ഥാപനം പൂട്ടാൻ നിർദേശം നൽകിയത്.