മം​ഗളാദേവി ഉത്സവത്തിനിടെ പൊലീസുകാരനുൾപ്പെടെ എട്ട് പേർക്ക് ഇടിമിന്നലേറ്റു

കുമളി: കേരള- തമിഴ്നാട് അതിർത്തിയിലെ പ്രസിദ്ധമായ മം​ഗളാദേവി ക്ഷേത്രത്തിൽ ചിത്രാപൗർണമി ഉത്സവത്തിനിടെ എട്ട് പേർക്ക് ഇടിമിന്നലേറ്റു. ഒരു പൊലീസ് ഉദ്യോ​ഗസ്ഥൻ ഉൾപ്പെടെയുള്ളവർക്കാണ് മിന്നലേറ്റത്. ആരുടെയും നില ​ഗുരുതരമല്ലെന്നാണ് വിവരം. പരിക്കേറ്റവരെ കുമളി സർക്കാർ ആശുപത്രിയിൽ പ്രവേശിപ്പിച്ചു.

ഉത്സവം കണ്ട് മടങ്ങവെ ഒൻപതാം വളവ് എന്ന ഭാ​ഗത്തുവെച്ചാണ് മിന്നലേറ്റത്. ഉച്ചയ്ക്ക് ശേഷം പ്രദേശത്ത് ശക്തമായ മഴയും ഇടിമിന്നലും ഉണ്ടായിരുന്നു. ഒൻപതാം വളവിൽ ഡ്യൂട്ടിയിലുണ്ടായിരുന്ന പൊലീസുകാരൻ മിന്നലേറ്റതോടെ തെറിച്ചുവീണു. ഇദ്ദേഹത്തിന്റെ കൈയ്ക്ക് ഒടിവുണ്ട്. പരിക്കേറ്റവരെ ഉടൻതന്നെ ആംബുലൻസുകളിൽ ആശുപത്രിയിലെത്തിച്ചു.