print edition വോട്ടർപ്പട്ടിക തീവ്ര പുനഃപരിശോധന ; 2.78 ലക്ഷം പേർ പുറത്ത്‌ ; 
60,344 പേരെ കണ്ടെത്താനായില്ല

തിരുവനന്തപുരം

എന്യൂമറേഷൻ ഫോം വിതരണം പൂർത്തിയാക്കാതെ വോട്ടർപ്പട്ടിക തീവ്ര പുനഃപരിശോധനയുടെ രണ്ടാംഘട്ടം ആരംഭിച്ച്‌ കേന്ദ്ര തെരഞ്ഞെടുപ്പ്‌ കമീഷൻ. 2.78 ലക്ഷം വോട്ടർമാർക്ക്‌ ഫോം എത്തിക്കാതെയാണ്‌ ഓൺലൈനിൽ വിവരങ്ങൾ അപ്‌ലോഡ്‌ ചെയ്യുന്ന നടപടിയിലേക്ക്‌ കടന്നത്‌. ഇതിൽത്തന്നെ 60,344 വോട്ടർമാർ പട്ടികയിൽനിന്ന്‌ എന്നെന്നേക്കും പുറത്താകുമെന്നുറപ്പായി. ഇ‍ൗ വോട്ടർമാരുടെ താമസസ്ഥലം പരിശോധിച്ചുറപ്പിക്കാൻ കഴിഞ്ഞില്ലെന്ന്‌ ബിഎൽഒമാർ റിപ്പോർട്ട്‌ നൽകി. ഇവരെ പട്ടികയിൽനിന്ന്‌ വെട്ടും. ബാക്കിയുള്ളവർക്ക്‌ ഫോം നൽകാൻ ഡിസംബർ നാലുവരെ സമയമുണ്ടെന്നാണ്‌ കമീഷൻ ന്യായീകരണം. എന്നാൽ, തദ്ദേശ തെരഞ്ഞെടുപ്പിന്റെ തിരക്കിലേക്ക്‌ കടന്ന സാഹചര്യത്തിൽ ഇത്‌ പൂർണമായി നടക്കാനിടയില്ല.

ഫലത്തിൽ നല്ലൊരു ശതമാനം വോട്ടർമാർ പട്ടികയ്‌ക്ക്‌ പുറത്താകും. ആദ്യഘട്ടത്തിന്റെ സമയപരിധി നീട്ടണമെന്ന്‌ ബിഎൽഒമാരടക്കമുള്ളവർ നിരന്തരം ആവശ്യപ്പെട്ടിരുന്നു. എന്നിട്ടും കമീഷൻ തുടർന്ന പിടിവാശിയാണ്‌ ഇത്രയുംപേരെ പുറത്തുനിർത്തി അടുത്ത നടപടിയിലേക്ക്‌ കടക്കാൻ സാഹചര്യമൊരുക്കിയത്‌.