print edition കണക്കുകൾ പെരുപ്പിച്ച്‌ എസ്‌ഐആർ ; കമീഷന്റെയും സിഇഒയുടെയും റിപ്പോർട്ടിൽ വൈരുധ്യം

തിരുവനന്തപുരം

കേരളത്തിലെ വോട്ടർപ്പട്ടിക തീവ്ര പുനഃപരിശോധനയുമായി ബന്ധപ്പെട്ട്‌ കേന്ദ്ര തെരഞ്ഞെടുപ്പ്‌ കമീഷനും സംസ്ഥാന മുഖ്യ തെരഞ്ഞെടുപ്പ്‌ ഓഫീസറും (സിഇഒ) പുറത്തുവിട്ട കണക്കുകളിൽ ഗുരുതര പൊരുത്തക്കേടുകൾ. കേരളത്തിൽ കണക്കുകൾ വൻതോതിൽ പെരുപ്പിച്ചുകാട്ടിയെന്ന പരാതി ശരിവയ്‌ക്കുന്നു ഇ‍ൗ റിപ്പോർട്ടുകൾ.

സംസ്ഥാനത്തെ 2,78,50,855 വോട്ടർമാർക്ക്‌ എന്യൂമറേഷൻ ഫോം നൽകുമെന്നായിരുന്നു ഔദ്യോഗിക അറിയിപ്പ്‌. 99.5 ശതമാനത്തിലേറെ പേർക്ക്‌ ഫോം നൽകിയെന്ന് സിഇഒ ശനിയാഴ്‌ച അവകാശപ്പെട്ടു. ഈ കണക്കുകളെ പൂർണമായും തള്ളിക്കളയുന്ന ബുള്ളറ്റിനാണ്‌ ഞായറാഴ്‌ച കേന്ദ്ര തെരഞ്ഞെടുപ്പ്‌ കമീഷൻ പുറത്തിറക്കിയത്‌. ബുള്ളറ്റിൻ പ്രകാരം 2,70,80,135 പേർക്കാണ്‌ ഫോം നൽകിയത്‌. അതായത്‌ 97.23 ശതമാനം മാത്രം. ബാക്കിയുള്ള 7,70,720 ഫോമുകൾ വിതരണം ചെയ്യാത്തതിൽ മറുപടിയുമില്ല. വോട്ടർപ്പട്ടികയുടെ സുതാര്യതയും വിശ്വാസ്യതയും ചോദ്യം ചെയ്യുന്നതാണ് ഈ നടപടി. കമീഷൻതന്നെ വൈരുധ്യമുള്ള കണക്ക് പുറത്തുവിട്ടതോടെ എസ്‌ഐആറിന്റെ ആധികാരികതയിൽ ചോദ്യമുയരുകയാണ്.

രണ്ട്‌ റിപ്പോർട്ടുകളും താരതമ്യംചെയ്‌താൽ ലക്ഷക്കണക്കിന് വോട്ടർമാരുടെ കണക്കിൽ വ്യത്യാസമുണ്ടാകും. ഫോം വിതരണത്തിൽ കൃത്രിമം കാണിച്ച്‌ വ്യാജ കണക്ക് റിപ്പോർട്ട്‌ ചെയ്യാൻ ബിഎൽഒമാരോട്‌ ആവശ്യപ്പെടുന്നതായി പരാതിയുണ്ടായിരുന്നു. ഓൺ‌ലൈൻ ആപ്ലിക്കേഷനിൽ വിതരണംചെയ്‌തു എന്ന് രേഖപ്പെടുത്തിയശേഷം പതുക്കെ ഫോം കൊടുത്താൽ മതി എന്നായിരുന്നു നിർദേശം. 99 ശതമാനത്തിലേറെ പേർക്ക്‌ ഫോം വിതരണംചെയ്‌തെന്ന സിഇഒയുടെ വാദത്തെ ബിജെപി ഒഴികെയുള്ള പാർടികൾ ചോദ്യംചെയ്‌തിരുന്നു. പ്രാദേശികതലത്തിൽ പാർടി പ്രവർത്തകർക്ക്‌ നിരവധി പരാതികൾ ലഭിച്ചിരുന്നു. ബിഎൽഒ മൂന്നുതവണ വീടുകയറുമെന്ന്‌ പറഞ്ഞെങ്കിലും സമയം നൽകാത്തതിനാൽ നടന്നില്ല.

അതേസമയം 2,13,370 പേരെ ‘കണ്ടെത്താൻ കഴിയാത്തവരുടെ’ ലിസ്റ്റിൽപ്പെടുത്തി. ഇവരെ വോട്ടർപട്ടികയിൽനിന്ന്‌ നീക്കും. 76,37,216 ഫോമുകൾ ഡിജിറ്റൈസ്‌ ചെയ്‌തു. വിതരണംചെയ്‌ത ആകെ ഫോമുകളുടെ 27.42 ശതമാനമാണിത്‌.