കോൺഗ്രസ് സ്ഥാനാർത്ഥി പട്ടിക; വനിതാ പ്രാധിനിത്യത്തിന്റെ കുറവ് നീതികേടെന്ന് ശശി തരൂർ

ന്യൂഡൽഹി: കേരള നിയമസഭാ തിരഞ്ഞെടുപ്പിനുള്ള കോൺഗ്രസ് സ്ഥാനാർത്ഥി പട്ടികയിൽ വനിതകൾക്ക് അർഹമായ പരിഗണന ലഭിക്കാത്തത് നീതികേടാണെന്ന് ശശി തരൂർ എംപി. സ്ഥാനാർത്ഥി നിർണ്ണയത്തിൽ തനിക്ക് പങ്കില്ലെന്ന് വ്യക്തമാക്കിയ അദ്ദേഹം, സ്ത്രീകൾക്ക് കൂടുതൽ പ്രാതിനിധ്യം നൽകണമെന്ന നിലപാടുകാരനാണ് താനെന്നും കൂട്ടിച്ചേർത്തു.

വിജയസാധ്യതയാണ് മാനദണ്ഡമെന്നാണ് നേതൃത്വം പറയുന്നത്. തീരുമാനങ്ങൾ എടുത്തവർ എല്ലാ ഘടകങ്ങളും പരിഗണിച്ചിട്ടുണ്ടാകാം. എങ്കിലും വനിതാ ബില്ലിനെ ശക്തമായി പിന്തുണച്ച ഒരാളെന്ന നിലയിൽ, കൂടുതൽ വനിതകൾ പട്ടികയിൽ ഇടംപിടിക്കേണ്ടതായിരുന്നു എന്ന് അദ്ദേഹം ഡൽഹിയിൽ മാധ്യമങ്ങളോട് പറഞ്ഞു.

കോൺഗ്രസ് മത്സരിക്കുന്ന 92 സീറ്റുകളിൽ വെറും ഒമ്പത് മണ്ഡലങ്ങളിൽ മാത്രമാണ് വനിതകളെ പരിഗണിച്ചിട്ടുള്ളത്. കടുത്ത തർക്കങ്ങൾക്കും അനിശ്ചിതത്വങ്ങൾക്കും ഒടുവിൽ വ്യാഴാഴ്ച വൈകുന്നേരമാണ് രണ്ടാം ഘട്ട പട്ടിക പുറത്തുവിട്ടത്.

പ്രമുഖരായ പല നേതാക്കൾക്കും സീറ്റ് നിഷേധിക്കപ്പെട്ടത് പാർട്ടിയിൽ വലിയ ചർച്ചകൾക്ക് വഴിവെച്ചിട്ടുണ്ട്. വനിതാ പ്രാതിനിധ്യത്തിലെ കുറവ് വരും ദിവസങ്ങളിൽ പാർട്ടിയിൽ വലിയ ആഭ്യന്തര ചർച്ചകൾക്കും പ്രതിഷേധങ്ങൾക്കും കരണമായേക്കുമെന്നാണ് സൂചന.