നീറ്റ് പരീക്ഷാ ക്രമക്കേട്: സംസ്ഥാനവ്യാപക പ്രതിഷേധവുമായി എസ്എഫ്‌ഐ; ഇന്ന് ജില്ലാ കേന്ദ്രങ്ങളിൽ മാർച്ച്

തിരുവനന്തപുരം: നീറ്റ് പരീക്ഷാ ചോദ്യപേപ്പർ ചോർച്ചയിലും എൻടിഎയുടെ ക്രമക്കേടുകളിലും പ്രതിഷേധിച്ച് കേന്ദ്രസർക്കാരിനെതിരെ സമരം കടുപ്പിച്ച് എസ്എഫ്‌ഐ. ഇന്ന് സംസ്ഥാനവ്യാപകമായി പ്രതിഷേധം സംഘടിപ്പിക്കും. തിരുവനന്തപുരം ഒഴികെയുള്ള 13 ജില്ലാ കേന്ദ്രങ്ങളിൽ കേന്ദ്രസർക്കാർ സ്ഥാപനങ്ങളിലേക്ക് എസ്എഫ്‌ഐ മാർച്ച് നടത്തും.

കഴിഞ്ഞ ദിവസം തിരുവനന്തപുരത്ത് എജി ഓഫീസിലേക്ക് എസ്എഫ്‌ഐ വൻ പ്രതിഷേധ മാർച്ച് സംഘടിപ്പിച്ചിരുന്നു. കേന്ദ്രമന്ത്രിമാർക്കെതിരെ കരിങ്കൊടി പ്രതിഷേധം ഉൾപ്പെടെയുള്ള സമരപരിപാടികളുമായി മുന്നോട്ട് പോകാനാണ് സംഘടനയുടെ തീരുമാനം.

ലക്ഷക്കണക്കിന് വിദ്യാർത്ഥികളുടെ ഭാവി തുലയ്ക്കുന്ന രീതിയിൽ പരീക്ഷാ ക്രമക്കേടുകൾ പതിവാകുന്ന സാഹചര്യത്തിൽ, പരീക്ഷാ നടത്തിപ്പ് ചുമതലയുള്ള നാഷണൽ ടെസ്റ്റിംഗ് ഏജൻസി (എൻടിഎ) ഉടൻ പിരിച്ചുവിടണമെന്ന് എസ്എഫ്‌ഐ ആവശ്യപ്പെട്ടു.

അഴിമതിക്കാർക്ക് ഒത്താശ ചെയ്യുന്ന കേന്ദ്ര സർക്കാർ നയം തിരുത്തണമെന്നും പരീക്ഷാ അട്ടിമറിയിൽ സമഗ്രമായ അന്വേഷണം നടത്തി കുറ്റവാളികളെ ശിക്ഷിക്കണമെന്നുമാണ് വിദ്യാർത്ഥികളുടെ ആവശ്യം.

പരീക്ഷാ പേപ്പർ ചോർച്ചയെത്തുടർന്ന് നീറ്റ് യുജി റദ്ദാക്കിയതോടെ വിദ്യാർത്ഥികൾ വലിയ ആശങ്കയിലാണ്. എൻടിഎയുടെ വിശ്വാസ്യത തകർന്ന പശ്ചാത്തലത്തിൽ പരീക്ഷാ നടത്തിപ്പ് ശാസ്ത്രീയമായി പുനഃക്രമീകരിക്കണമെന്നും എസ്എഫ്‌ഐ ആവശ്യപ്പെട്ടു.