'​ഗവർണറെ ഭരണഘടന പഠിപ്പിക്കും'; ​ഗാന്ധിചിത്രവുമായി രാജ്ഭവനിലേക്ക് എസ്എഫ്ഐ മാർച്ച്

തിരുവനന്തപുരം: ഭരണഘടനയുടെ അന്തസ്സിനെ വെല്ലുവിളിച്ച ​ഗവർണർ രാജേന്ദ്ര വിശ്വനാഥ് ആർലേക്കറുടെ നടപടിക്കെതിരെ രാജ്ഭവനിലേക്ക് എസ്എഫ്ഐ മാർച്ച് നടത്തി. ​ഗാന്ധിചിത്രവും ഉയർത്തി, ​'ഗവർണറെ ഭരണഘടന പഠിപ്പിക്കും' എന്ന ബാനറുമായാണ് പ്രവർത്തകർ മാർച്ചിൽ പങ്കെടുത്തത്. എസ്എഫ്ഐ സംസ്ഥാന സെക്രട്ടറി പി എസ് സഞ്ജീവ് ഉൾപ്പെടയുള്ള നേതാക്കൾ പ്രതിഷേധത്തിന് നേതൃത്വം നൽകി.

രാജ്ഭവനിലെ ഓദ്യോ​ഗിക പരിപാടിയിൽ കാവിക്കൊടി പിടിച്ച സ്ത്രീയുടെ ചിത്രം വീണ്ടും ഉപയോ​ഗിച്ച നടപടിക്കെതിരെ വ്യാപക പ്രതിഷേധമാണ് ഉയരുന്നത്. വ്യാഴാഴ്ച രാജ്ഭവനിൽ നടന്ന സ്കൗട്ട് ആൻഡ് ​ഗൈഡ്സ് പരിപാടിക്കെത്തിയ വിദ്യാഭ്യാസമന്ത്രി വി ശിവൻകുട്ടി ഈ ചിത്രം വെച്ച നടപടിയിൽ പ്രതിഷേധിച്ച് പരിപാടി ബഹിഷ്കരിച്ചിരുന്നു. സർക്കാരും രാജ്ഭവനും സംയുക്തമായി നടത്തുന്ന പരിപാടിയാണിതെന്നും ഇത്തരം വേദിയിൽ രാഷ്ട്രീയചിഹ്നങ്ങൾ വെക്കരുതെന്നും ​ഗവർണറോട് വേദിയിൽവെച്ച് ആവശ്യപ്പെട്ടശേഷമാണ് മന്ത്രി വേദിവിട്ടിറങ്ങിയത്.