സ്കൂൾ ​പ്രവേശനോത്സവം ജൂൺ രണ്ടിന്‌ ; മുഖ്യമന്ത്രി ഉദ്‌ഘാടനംചെയ്യും

ആലപ്പുഴ

സംസ്ഥാനതല സ്കൂൾ ​പ്രവേശനോത്സവം ജൂൺ രണ്ടിന്​ രാവിലെ 9.30ന്‌ കലവൂർ ഗവ. ഹയർ സെക്കൻഡറി സ്കൂളിൽ മുഖ്യമന്ത്രി പിണറായി വിജയൻ ഉദ്​ഘാടനം ചെയ്യുമെന്ന്‌ മന്ത്രി വി ശിവൻകുട്ടി വാർത്താസമ്മേളനത്തിൽ പറഞ്ഞു. സംസ്ഥാന സ്​കൂൾ പ്രവേശനോത്സവം സ്വാഗതസംഘ രൂപീകരണത്തോടനുബന്ധിച്ച്‌ ആലപ്പുഴ കലവൂർ ഗവ. ഹയർ സെക്കൻഡറി സ്കൂളിൽ വാർത്താസമ്മേളനത്തിൽ സംസാരിക്കുകയായിരുന്നു മന്ത്രി. സംസ്ഥാനതല ഉദ്ഘാടനം എല്ലാ സ്കൂളുകളിലും തൽസമയം സംപ്രേഷണം ചെയ്യും. ഇതിനുശേഷം ജില്ലകളിൽ സ്കൂൾതല പ്രവേശനോത്സവവും ജില്ലാതല പ്രവേശനോത്സവവും നടത്തും.

സ്‍കൂൾ കെട്ടിടങ്ങളുടെ അറ്റകുറ്റപ്പണി 27 നകം പൂർത്തിയാക്കണം. നിർമാണ പ്രവർത്തനങ്ങൾ നടക്കുന്നതിനാൽ വാടകക്കെട്ടിടത്തിലോ മറ്റോ ക്ലാസ്‌ പ്രവർത്തിക്കുന്നുണ്ടെങ്കിൽ ഇതിന്റെയും ഫിറ്റ്നസ് ഉറപ്പാക്കണം. തദ്ദേശസ്ഥാപനത്തിന്റെ സർട്ടിഫിക്കറ്റ് ഉണ്ടെങ്കിലേ ക്ലാസ്‌ തുടങ്ങാനാകൂ. ഭിന്നശേഷി കുട്ടികൾക്ക്‌ പ്രത്യേക പരിഗണന ഉറപ്പാക്കണം. സ്കൂളിനടുത്ത്‌ വെള്ളക്കെട്ടുകൾ, കുളങ്ങൾ, കിണറുകൾ എന്നിവയ്ക്ക് സുരക്ഷാഭിത്തി ഉറപ്പാക്കണം. വിദ്യാർഥികളുടെ യാത്രാസുരക്ഷ സ്കൂൾതല അവലോകനത്തിൽ ഉറപ്പാക്കണം. സ്‌കൂൾ പരിസരത്തെ കടകളിൽ ലഹരിവസ്തു വിൽപ്പനയില്ലെന്ന്‌ ഉറപ്പാക്കാൻ എക്സൈസ്, പൊലീസ് സേവനം തേടാം. സ്‌കൂൾ പാചകപ്പുരയുമായി ബന്ധപ്പെട്ട്‌ അടുക്കളയും ഉപകരണങ്ങളുമെല്ലാം അണുവിമുക്തമാക്കണം. പാചകത്തൊഴിലാളികൾക്ക്‌ ഹെൽത്ത് കാർഡ് വേണം. പിടിഎ യോഗം 15-ന് മുമ്പ്‌ നടത്തണം.

വന്യമൃഗസാന്നിധ്യമുള്ളയിടങ്ങളിൽ സംരക്ഷണ വേലി അടക്കമുള്ള സുരക്ഷ ഉറപ്പാക്കണം. പട്ടികവർഗ വിഭാഗത്തിലെ കുട്ടികളെ വിദ്യാലയങ്ങളിൽ എത്തിക്കാൻ ആവിഷ്കരിച്ച പദ്ധതി കൃത്യമായി നടപ്പാക്കണം. പാഠപുസ്തകം, യൂണിഫോം, ഉച്ചഭക്ഷണ പദ്ധതി എന്നിവ മുൻനിർത്തി പ്രത്യേക യോഗം സംഘടിപ്പിക്കണമെന്നും മന്ത്രി നിർദേശിച്ചു.