സിനിമാ സംഘടനകളുടെ സമരത്തിന്‌ 
സർക്കാർപിന്തുണ : മന്ത്രി സജി ചെറിയാൻ

പത്തനംതിട്ട

‘ജാനകി vs സ്റ്റേറ്റ് ഓഫ് കേരള' സിനിമയുടെ പേരുമാറ്റണമെന്ന സെൻസർബോർഡ്‌ നിർദേശത്തിനെതിരെ ചലച്ചിത്ര സംഘടനകൾ നടത്തുന്ന സമരത്തിനൊപ്പമാണ്‌ സർക്കാർ എന്ന്‌ മന്ത്രി സജിചെറിയാൻ. പേരുമാറ്റണമെന്നുള്ള നിർദേശം ആവിഷ്‌കാര സ്വാതന്ത്ര്യത്തിനുമേലുള്ള കടന്നുകയറ്റമാണെന്നും മന്ത്രി മാധ്യമപ്രവർത്തകരോട്‌ പറഞ്ഞു.

ആരോഗ്യമേഖലയിലെ കുത്തകകളെ സഹായിക്കുക എന്നത്‌ പ്രതിപക്ഷം ചുമതലയായി ഏറ്റെടുത്തിരിക്കുകയാണ്‌. പൊതുജനാരോഗ്യമേഖലയെ തകർക്കാനുള്ള ഗൂഢാലോചനയാണ്‌ നടക്കുന്നത്‌. അതിനുവേണ്ടി മന്ത്രി വീണാജോർജിനെ ബലിയാടാക്കുന്നു.

ആരോഗ്യമന്ത്രിയെ വ്യക്തിപരമായി ആക്രമിക്കാൻ ശ്രമിച്ചാൽ സംരക്ഷിക്കാനുള്ള കഴിവ്‌ ഇടതുപക്ഷത്തിനുണ്ട്‌. പഞ്ചായത്ത്‌, അസംബ്ലി തെരഞ്ഞെടുപ്പുകൾ മുന്നിൽകണ്ടുള്ള ബഹളമാണ്‌ യുഡിഎഫ്‌ നടത്തുന്നത്‌. എൽഡിഎഫ്‌ സർക്കാർ മൂന്നാമതും അധികാരത്തിൽവരും എന്ന്‌ ഉറപ്പായപ്പോഴുള്ള വെപ്രാളമാണ്‌ അവർക്കെന്നും മന്ത്രി പറഞ്ഞു.