'പൃഥ്വിരാജ് ​ഹിന്ദു വിരുദ്ധൻ, മോഹൻലാലിന്റേത് വഞ്ചന': 'എമ്പുരാനെ'തിരെ ആർഎസ്എസ് മുഖമാസിക

ന്യൂഡൽഹി : ​ഗുജറാത്ത് കലാപത്തിലെ സംഘപരിവാർ ഇടപെടൽ തുറന്നുകാട്ടിയതിനു പിന്നാലെ എമ്പുരാൻ സിനിമയ്ക്കെതിരെ ലേഖനവുമായി ആർഎസ്എസ് മുഖമാസിക ഓർഗനൈസർ. എമ്പുരാന്റേത് ഹിന്ദുത്വ വിരുദ്ധ രാഷ്ട്രീയ അജണ്ടയാണെന്നും ഹിന്ദുത്വ വിരുദ്ധത ചിത്രീകരിക്കാനായി ​ഗോധ്ര കലാപത്തെ ഉപയോ​ഗിച്ചുവെന്നുമാണ് ഓർ​ഗനൈസറിൽ വന്ന ലേഖനത്തിൽ പറയുന്നത്.

സിനിമ പുറത്തിറങ്ങിയതിനു പിന്നാലെ മോഹൻലാലിനും പൃഥ്വിരാജിനുമെതിരെ സംഘപരിവാർ സൈബർ ആക്രമണം ശക്തമാക്കിയിരുന്നു. പൃഥ്വിരാജിന്റെ വിദേശ ബന്ധങ്ങൾ അന്വേഷിക്കണമെന്ന് യുവമോർച്ച നേതാവ് ആവശ്യപ്പെട്ടിരുന്നുയ മോഹൻലാലിന്റെ ലഫ്റ്റനന്റ് കേണൽ പദവി പിൻവലിക്കണമെന്നായിരുന്നു ബിജെപി ദേശീയ കൗൺസിൽ അം​ഗത്തിന്റെ ആവശ്യം. ഇതിനു പിന്നാലെയാണ് തീവ്ര വിമർശനവുമായി ആർഎസ്എസ് മുഖപത്രം രം​ഗത്തെത്തിയത്.

പഴയ രാഷ്ട്രീയ അജണ്ടകളെ കുത്തിപ്പൊക്കാനുള്ള മാർ​ഗമായാണ് പൃഥ്വിരാജ് എമ്പുരാനെ ഉപയോ​ഗിച്ചതെന്നു പറഞ്ഞാണ് ലേഖനം തുടങ്ങുന്നത്. ചരിത്രത്തിലെ യഥാർത്ഥ സംഭവങ്ങളിൽ ശ്രദ്ധ കേന്ദ്രീകരിക്കുന്നതിനുപകരം, 2002ലെ ഗോധ്രാനന്തര കലാപത്തിന്റെ പശ്ചാത്തലത്തിൽ സാമൂഹിക ഐക്യത്തിന് ഗുരുതരമായ ഭീഷണി ഉയർത്തുന്ന വിഭാഗീയ- ഹിന്ദു വിരുദ്ധവുമായ ആഖ്യാനമാണ് എമ്പുരാൻ മുന്നോട്ട് വയ്ക്കുന്നതെന്ന് ലേഖനത്തിൽ വിമർശിക്കുന്നു.

2002ലെ ഗുജറാത്ത് കലാപത്തിൽ ഹിന്ദുക്കളാണ് കുറ്റക്കാരെന്നു വരുത്താനും രണ്ടു സമുദായങ്ങൾക്കിടയിൽ വിദ്വേഷം വളർത്താനും ഹിന്ദുക്കളെ വില്ലന്മാരായി ചിത്രീകരിക്കാനും സിനിമയിൽ ശ്രമമുണ്ടെന്നും സംവിധായകൻ പൃഥ്വിരാജിന്റെ രാഷ്ട്രീയ ചായ്‌വുകൾ വളരെ സൂക്ഷ്മതയോടെ സിനിമയിൽ അവതരിപ്പിച്ചിരിക്കുകയാണെന്നും പറയുന്നു. പൗരത്വ ദേ​ദ​ഗതിയിലടക്കം പൃഥ്വിരാജ് സ്വീകരിച്ച നിലപാട് ദേശവിരുദ്ധമാണെന്നും പറയുന്നുണ്ട്.

കേരളത്തെ തകർക്കാനെത്തുന്ന വ്യക്തിയായി ചിത്രീകരിക്കുന്നത് ബിജെപി അനുഭാവമുള്ളയാളെയാണ്. ബിജെപിയെയും ഹിന്ദു ദേശീയതയെയും അപകടകരമായി അവതരിപ്പിക്കുന്നതിലൂടെ എമ്പുരാൻ സാമൂഹിക അസ്വസ്ഥതകളും വിദ്വേഷവും വളർത്തും. ഹിന്ദു സമുദായത്തെ ആകെ അപകീർത്തിപ്പെടുത്താൻ സിനിമ വയലൻസിനെ ഉപയോഗിക്കുന്നു. രക്ഷകരായി ചിത്രീകരിക്കപ്പെടാവുന്ന സാഹചര്യങ്ങളിൽ പോലും ഹിന്ദുക്കളെ വില്ലന്മാരായി ചിത്രീകരിക്കുന്നു. ഈ സിനിമയിൽ അഭിനയിച്ചതിലൂടെ മോഹൻലാൽ രാജ്യത്തോടും ആരാധകരോടും കടുത്ത ചതിയാണ് ചെയ്തത്. എമ്പുരാൻ ഒരു ഹിന്ദു വിരുദ്ധ, ഇന്ത്യാ വിരുദ്ധ അജണ്ട വ്യക്തമാക്കുന്ന സിനിമയായി ദേശീയ തലത്തിൽ തുറന്നുകാട്ടപ്പെടണമെന്നും ലേഖനത്തിൽ വിമർശിക്കുന്നു.

എമ്പുരാൻ സിനിമയുടെ സെൻസറിങ്ങിൽ വീഴ്ച പറ്റിയതായി കഴിഞ്ഞ ദിവസം ബിജെപി കോർ കമ്മിറ്റി യോഗത്തിൽ വിമർശനം ഉയർന്നിരുന്നു.