രോഹിതിനും കുഞ്ഞനിയത്തിക്കും ഇനി മഴനനയാതെ ഉറങ്ങാം...

കൽപ്പറ്റ : പുതിയ വീടിന്റെ താക്കോൽ മുഖ്യമന്ത്രിയിൽനിന്ന്‌ അമ്മ സജിത ഏറ്റുവാങ്ങുന്നത്‌ ഏഴാം ക്ലാസുകാരൻ രോഹിത്‌ സദസ്സിലിരുന്ന്‌ കൺനിറയെ കണ്ടു. 12 വയസ്സിനിടെ കണ്ട ഏറ്റവും സുന്ദരമായ കാഴ്‌ച. വേദിയിൽനിന്ന്‌ മടങ്ങിയെത്തിയ അമ്മയിൽനിന്ന്‌ താക്കോലിന്റെ മാതൃക വാങ്ങി കൗതുകത്തോടെ നോക്കി. വീടെന്ന സ്വപ്‌നം യാഥാർഥ്യമായതിന്റെ സന്തോഷം കുഞ്ഞ്‌ രോഹിതിന്റെ മുഖത്ത്‌ തെളിഞ്ഞു. തനിക്കും മൂന്നുവയസുകാരി അനിയത്തി റിതികയ്‌ക്കും ഇനി മഴയെ പേടിക്കാതെ ഉറങ്ങാമെന്നത്‌ അവനിൽ ആത്മവിശ്വാസംനിറച്ചു. പരൂർകുന്ന് പുനരധിവാസ മേഖലയിൽ സർക്കാർ നിർമിച്ചുനൽകിയ വീട്ടിലേക്ക്‌ ഇവർ ഉടൻ താമസം മാറും.

മഴപെയ്‌താൽ മുട്ടിൽ പുഴകുനിയിൽ തോടിനുകരയിലെ ഇവരുടെ വീട്ടിൽ വെള്ളംകയറുമായിരുന്നു. പലവട്ടം പാഠപുസ്‌തകങ്ങളും വസ്‌ത്രങ്ങളും നശിച്ചിട്ടുണ്ട്‌. പ്ലാസ്റ്റിക്കിൽ നിർമിച്ച കൂര ഏതുനിമിഷവും തകർന്നുവീഴാവുന്ന നിലയിലായിരുന്നു. 2018ലെ പ്രളയത്തിൽ വീട്‌ മുങ്ങി.

വീട്‌ ലഭിച്ചതിൽ വലിയ സന്തോഷമുണ്ടെന്ന്‌ മുട്ടിൽ കൊറലാടി സ്വദേശി സജിത പറഞ്ഞു. സംസ്ഥാന സർക്കാരിന്റെ നാലാംവാർഷിക ഭാഗമായി സംഘടിപ്പിച്ച ജില്ലാതല യോഗത്തിൽവച്ച്‌ പരൂർകുന്ന് പുനരധിവാസ മേഖലയിലെ അഞ്ച്‌ കുടുംബങ്ങൾക്ക്‌ വീടിന്റെ താക്കോൽ കൈമാറി. 123 പട്ടികവർഗ കുടുംബങ്ങൾക്കാണ്‌ പരൂർകുന്നിൽ ആദ്യഘട്ടത്തിൽ വീട്‌ നൽകുന്നത്‌.

മുട്ടിൽ തെക്കുംപാടിയിലെ സ്‌മിത രവി, സരിത മണി, വാഴവറ്റ കരിമത്ത്‌ വയലിൽ നാരായണി, മേപ്പാടി മുണ്ടുപാറയിലെ ഷിജിത എന്നിവർക്കും ചടങ്ങിൽ താക്കോൽ കൈമാറി. ‘‘മഴയെ ഭയന്നാണ്‌ ജീവിച്ചിരുന്നത്‌, സുരക്ഷിതമായ ജീവിതമാണ്‌ സർക്കാർ ഇപ്പോൾ നൽകിയത്‌. പരൂർകുന്നിലെ വീട്‌ കണ്ടിരുന്നു. എല്ലാ സൗകര്യവുമുണ്ട്‌. സർക്കാരിനോട്‌ ഒരുപാട്‌ നന്ദിയുണ്ട്‌’’–- സജിത പറഞ്ഞു. പദ്ധതിയിൽ 42 വീടുകളുടെ നിർമാണം ഉടൻ പൂർത്തിയാകും. സംസ്ഥാനത്തെ ഏറ്റവും വലിയ ആദിവാസി പുനരധിവാസ പദ്ധതികളിലൊന്നാണിത്‌.