ഹൃദ്രോഗവിദഗ്ധന്‍ ഡോ. ജി വിജയരാഘവന്‍ അന്തരിച്ചു

തിരുവനന്തപുരം: പ്രശസ്ത ഹൃദ്രോഗവിദഗ്ധന്‍ ഡോ. ജി വിജയരാഘവന്‍ (84) അന്തരിച്ചു. തിരുവനന്തപുരത്തായിരുന്നു അന്ത്യം. വാർധക്യസഹജമായ അസുഖങ്ങളെ തുടർന്ന് ചികിത്സയിലായിരുന്നു.

1964-ൽ തിരുവനന്തപുരം മെഡിക്കൽ കോളേജിൽ നിന്നാണ് എംബിബിഎസ് പഠനം പൂർത്തിയാക്കിയത്. തിരുവനന്തപുരം മെഡിക്കൽ കോളേജിലും വെല്ലൂർ സിഎംസിയിലും അധ്യാപകനായി സേവനമനുഷ്ഠിച്ചു. കിംസ് ഹെൽത്ത് കെയറിന്റെ സ്ഥാപക ഡയറക്ടറും വൈസ് ചെയർമാനുമാനുമാണ്.

കേരളത്തിലെ സൊസൈറ്റി ഫോർ കണ്ടിന്യൂയിം​ഗ് മെഡിക്കൽ എഡ്യുക്കേഷൻ ​ഗവേഷക സമിതിയുടെ പ്രസിഡന്റായും പ്രവർത്തിച്ചിട്ടുണ്ട്. ഇന്ത്യയിൽ 2D എക്കോ കാർഡിയോഗ്രാഫി പ്രചാരത്തിലാക്കുന്നതിലും ആദ്യ 2D എക്കോ ലബോറട്ടറി സ്ഥാപിക്കുന്നതിലും നിർണായക പങ്കുവഹിച്ചു. വൈദ്യശാസ്ത്ര രംഗത്തെ സമഗ്ര സംഭാവനകൾ പരിഗണിച്ച് 2009ൽ രാജ്യം പത്മശ്രീ നൽകി ആദരിച്ചു.