print edition കാനത്തിൽ ജമീല; എന്നും ജനഹൃദയങ്ങളിൽ തിളങ്ങിയ നേതാവ്

കൊയിലാണ്ടി: സിപിഐ എമ്മിൽ സാധാരണ പാർടി പ്രവർത്തകയായി പൊതുപ്രവർത്തനരംഗത്തെത്തിയ കാനത്തിൽ ജമീല എന്നും ജനഹൃദയങ്ങളിൽ തിളങ്ങിയ നേതാവാണ്. വ്യക്തിബന്ധങ്ങൾക്ക് ഊന്നൽ നൽകിയ അവർ എല്ലാവിഭാഗം മനുഷ്യരോടും സൗഹൃദവും സ്‌നേഹവും പുലർത്തി. ഇതര രാഷ്ട്രീയ നേതാക്കളോടും പ്രവർത്തകരോടും ഊഷ്മളമായ സൗഹൃദമായിരുന്നു.

ജനാധിപത്യ മഹിളാ അസോസിയേഷൻ സംസ്ഥാന വൈസ് പ്രസിഡന്റും സിപിഐ എം ജില്ലാ കമ്മിറ്റി അംഗവുമാണ്. 2021 ൽ കൊയിലാണ്ടിയിൽനിന്ന് 8472 വോട്ടിന്റെ ഭൂരിപക്ഷത്തിനാണ് നിയമസഭയിലേക്ക് തെരഞ്ഞെടുക്കപ്പെട്ടത്. യുഡിഎഫ് സ്ഥാനാർഥി കോൺഗ്രസിലെ എൻ സുബ്രഹ്മണ്യനെയാണ് പരാജയപ്പെടുത്തിയത്‌.കൊയിലാണ്ടി മണ്ഡലത്തിന്റെ വികസനകാര്യത്തിൽ അതീവ ശ്രദ്ധാലുവായിരുന്നു. മണ്ഡലത്തിലെ റോഡുകളുടെ വികസനത്തിന് വലിയ പ്രാധാന്യം നൽകി. മുഖ്യമന്ത്രിയുടെ തദ്ദേശ റോഡ് പുനരുദ്ധാരണ പദ്ധതിയിൽ ഉൾപ്പെടുത്തി 27 റോഡുകൾക്ക് ഭരണാനുമതി നേടിയെടുക്കാനായത് വലിയ നേട്ടമായിരുന്നു. ബാലുശേരി–കൊയിലാണ്ടി നിയോജക മണ്ഡലങ്ങളെ ബന്ധിപ്പിച്ച് ഒളളൂർക്കടവ് പാലവും തോരായിക്കടവ് പാലവും യാഥാർഥ്യമാക്കുന്നതിൽ നിർണായക പങ്കുവഹിച്ചു. കൊയിലാണ്ടി ഹാർബറിന്റെ രണ്ടാംഘട്ട വികസന പ്രവർത്തനങ്ങൾ പൂർത്തീകരിക്കാൻ കേന്ദ്ര-–സംസ്ഥാന ഫണ്ടുകൾ ലഭ്യമാക്കാനും ഇടപെട്ടു. കാപ്പാടുമുതൽ ഹാർബർവരെ കടൽഭിത്തി ബലപ്പെടുത്തുന്നതിന് ആറ് കോടിയുടെ പദ്ധതിക്ക്‌ അംഗീകാരം നേടിയെടുത്തു. കൊയിലാണ്ടി സബ് ട്രഷറിക്ക്‌ പുതിയ കെട്ടിടം നിർമിക്കുന്ന കാര്യത്തിലും പ്രവർത്തിച്ചു.

കോതമംഗലം ജിഎൽപി സ്‌കൂൾ, കൊയിലാണ്ടി, പയ്യോളി ഹയർ സെക്കൻഡറി സ്‌കൂൾ എന്നിവയുടെ വികസനത്തിലും മുന്തിയ പരിഗണന നൽകി. ഇരിങ്ങൽ കോട്ടയ്ക്കൽ ഭാഗത്ത് മൂരാട് പുഴയിൽ സ്ഥിതിചെയ്യുന്ന കോട്ടത്തുരുത്ത്‌ കെട്ടി സംരക്ഷിക്കുന്നതിന് 1.40 കോടി രൂപയുടെ ഭരണാനുമതി നേടിയെടുത്തു. അഴിമുഖത്തിനടുത്ത് സ്ഥിതിചെയ്യുന്ന കോട്ടത്തുരുത്തിൽ എഴുപതിലധികം വീടുകളുണ്ട്. പുഴയിലെ ശക്തമായ വേലിയേറ്റത്തിൽ വൻതോതിൽ വെള്ളംകയറി തുരുത്ത് പുഴയെടുക്കുന്ന അവസ്ഥയ്ക്ക് പരിഹാരമായിട്ടാണ് തുരുത്ത് സംരക്ഷണ നടപടി സ്വീകരിച്ചത്. വെളിയണ്ണൂർ ചല്ലി നെൽകൃഷി വികസന കാര്യത്തിലും പ്രാധാന്യം നൽകി. നടേരി വലിയ മലയിൽ വെറ്ററിനറി സർവകലാശാലയുടെ കേന്ദ്രം ആരംഭിക്കാനുള്ള നടപടിയുമെടുത്തു.

2006ൽ പി വിശ്വനും 2010ലും 11ലും കെ ദാസനും കൊയിലാണ്ടിയിൽനിന്ന് വിജയിച്ചതിന്റെ തുടർച്ചയായിട്ടാണ് 2021ൽ കാനത്തിൽ ജമീലയും കൊയിലാണ്ടിയിൽ വിജയക്കൊടി പാറിച്ചത്. ജനഹൃദയത്തിൽ നിറഞ്ഞുനിൽക്കുമ്പോഴാണ്‌ ആകസ്മികമായ വിയോഗം. കഴിഞ്ഞ നിയമസഭാ തെരഞ്ഞെടുപ്പിൽ യുഡിഎഫിന് ആധിപത്യമുണ്ടായിരുന്ന സ്ഥലങ്ങളിൽപോലും കാനത്തിൽ ജമീല വ്യക്തമായ മേധാവിത്വം നേടിയത് അമ്പരപ്പിക്കുന്നതായിരുന്നു. എംഎൽഎയെന്ന നിലയിൽ ജനങ്ങളുടെ പ്രശ്‌നങ്ങളോട് അനുകൂലമായ നിലപാടാണ് എന്നും അവർ സ്വീകരിച്ചത്. അനാരോഗ്യം വകവയ്‌ക്കാതെ മരണവീടുകളിലും വിവാഹവീടുകളിലും ഓടിയെത്തുമായിരുന്നു. എത്ര തിരക്കായാലും പാർടി പ്രവർത്തകർക്കൊപ്പമുണ്ടാകുമായിരുന്നു അവർ.