ഇനി ഇന്റർനെറ്റ് ബാങ്കിം​ഗും; കേരള ബാങ്കിന് ആർബിഐയുടെ അം​ഗീകാരം

തിരുവനന്തപുരം : കേരള ബാങ്കിന് ഇന്റർനെറ്റ് സേവനങ്ങൾ നടപ്പാക്കുന്നതിനുള്ള റിസർവ് ബാങ്ക് അനുമതി ലഭിച്ചു. ഇനി ഉപഭോക്താക്കൾക്ക് ബാങ്ക് സന്ദർശിക്കാതെ തന്നെ ഓൺലൈനിലൂടെ ബാങ്കിം​ഗ് സേവനങ്ങൾ ലഭ്യമാകും. വ്യക്തി​ഗത ഉപഭോക്താക്കൾക്കും പ്രാഥമിക കാർഷിക വായ്പ സംഘങ്ങൾക്കും ഇതര സ്ഥാപനങ്ങൾക്കും കേരള ബാങ്ക് വഴി ഇന്റർനെറ്റ് ബാങ്കിം​ഗ് സൗകര്യം ലഭിക്കും. അം​ഗങ്ങളായ സംഘങ്ങൾക്ക് കേരള ബാങ്കിലുള്ള അക്കൗണ്ടിലൂടെ ആർടിജിഎസ്, എൻഇഎഫ്ടി ഉൾപ്പടെയുള്ള ഇന്റർനെറ്റ് ബാങ്കിം​ഗ് സേവനങ്ങൾ നടത്താൻ സാധിക്കും.

2019ൽ കേരള ബാങ്ക് രൂപീകരിച്ച് ചുരുങ്ങിയ കാലത്തിനുള്ളിൽ തന്നെ കോർ ബാങ്കിം​ഗ് സംവിധാനം അവതരിപ്പിച്ചിരുന്നു. യുപിഐ ഉൾപ്പടെയുള്ള ദൈനംദിന ബാങ്കിം​ഗ് സേവനങ്ങൾക്കായി കെബി പ്രൈം, കെബി പ്രൈം പ്ലസ് എന്നീ മൊബൈൽ ബാങ്കിം​ഗ് ആപ്പുകളും നിലവിലുണ്ട്. കഴിഞ്ഞ സാമ്പത്തിക വർഷം 9.8 കോടി ഇടപാടുകളിലൂടെ 16,041.25 കോടി രൂപയാണ് യുപിഐ വഴി വിനിമയം നടത്തിയത്. കേരള ബാങ്കിന് നിലവിൽ 1,28,967 കോടി രൂപയുടെ വിപണി മൂല്യമുണ്ട്.