സംവിധായകൻ ആർ ശരത് അന്തരിച്ചു

തിരുവനന്തപുരം : സംവിധായകൻ ആർ ശരത് (63) അന്തരിച്ചു. തിരുവനന്തപുരത്തെ സ്വകാര്യ ആശുപത്രിയിലായിരുന്നു അന്ത്യം. ദേശീയ, കേരള സംസ്ഥാന ചലച്ചിത്ര പുരസ്കാരങ്ങൾ ഉൾപ്പെടെ നിരവധി അംഗീകാരങ്ങൾ നേടിയിട്ടുള്ള അദ്ദേഹം സംവിധായകൻ, ഡോക്യുമെന്ററി ചലച്ചിത്രകാരൻ, കഥാകൃത്ത്, തിരക്കഥാകൃത്ത് എന്നീ നിലകളിലും ശ്രദ്ധേയനായിരുന്നു.

കൊല്ലം ജില്ലയിലെ വിളക്കുടിയിൽ ജനിച്ച ആർ ശരത് എറണാകുളം മഹാരാജാസ് കോളേജിൽ നിന്ന് ഇംഗ്ലീഷ് ഭാഷയിൽ ബിരുദവും യൂണിവേഴ്സിറ്റി കോളേജിൽ നിന്ന് ബിരുദാനന്തര ബിരുദവും നേടി. പൂനെ ഫിലിം ഇൻസ്റ്റിറ്റ്യൂട്ടിൽ നിന്ന് ഫിലിം അപ്രിസിയേഷൻ കോഴ്സും പൂർത്തിയാക്കി.

കേരള കൗമുദിയിൽ ജേണലിസ്റ്റായി പ്രവർത്തിച്ച അദ്ദേഹം പിന്നീട് കേരള സർക്കാരിന്റെ പബ്ലിക് റിലേഷൻസ് വകുപ്പിൽ ഡെപ്യൂട്ടി ഡയറക്ടറായി സേവനമനുഷ്ഠിച്ചു. 2017ൽ വിരമിച്ചു. വൈലോപ്പിള്ളി സംസ്കൃതി ഭവൻ ഡയറക്ടർ, ജില്ലാ ഇൻഫർമേഷൻ ഓഫീസർ എന്നീ നിലകളിലും പ്രവർത്തിച്ചിട്ടുണ്ട്.

ഡോക്യുമെന്ററി, ഹ്രസ്വചിത്ര രംഗത്തൂടെയാണ് ശരത് സിനിമയിലെത്തിയത്. രാജാ രവിവർമയുടെ ചിത്രങ്ങളെ അടിസ്ഥാനമാക്കി ഒരുക്കിയ ഡോക്യുമെന്ററി രാജ്യാന്തര തലത്തിൽ ശ്രദ്ധിക്കപ്പെട്ടു. ചുമർചിത്രങ്ങളെക്കുറിച്ചുള്ള ഗവേഷണത്തിന് കേന്ദ്ര സർക്കാരിന്റെ ജൂനിയർ ഫെലോഷിപ്പും ലഭിച്ചു. അച്ചിന്റെ കഥ, ചുമർചിത്രങ്ങൾ, ഭൂമിക്കൊരു ചരമഗീതം, മഹാത്മാഗാന്ധി റോഡ് തുടങ്ങിയ ഹ്രസ്വചിത്രങ്ങളും അദ്ദേഹത്തിന്റെ സംഭാവനകളാണ്.

സംവിധായകൻ ഷാജി എൻ കരുണിന്റെ അസിസ്റ്റന്റായും പ്രവർത്തിച്ചു. 2000ൽ പുറത്തിറങ്ങിയ സായാഹ്നം ആയിരുന്നു ആദ്യ ഫീച്ചർ ചിത്രം. പരിസ്ഥിതി, ആണവവിരുദ്ധ രാഷ്ട്രീയം തുടങ്ങിയ വിഷയങ്ങൾ പ്രമേയമാക്കിയ ചിത്രം നിരൂപക പ്രശംസ നേടിയതിനൊപ്പം ദേശീയ, സംസ്ഥാന തലങ്ങളിൽ നിരവധി പുരസ്കാരങ്ങൾ നേടി. ഇന്ദിരാഗാന്ധി പുരസ്കാരവും ചിത്രത്തിന് ലഭിച്ചു. സായാഹ്നം ഏഴ് കേരള സംസ്ഥാന ചലച്ചിത്ര പുരസ്കാരങ്ങൾ സ്വന്തമാക്കി.

സ്ഥിതി, ശീലാബതി, ബുദ്ധനും ചാപ്ലിനും ചിരിക്കുന്നു, പറുദീസ, സ്വയം തുടങ്ങിയ മലയാള ചിത്രങ്ങൾ സംവിധാനം ചെയ്തു. 'ദി ഡിസയർ: എ ജേർണി ഓഫ് എ വുമൺ' എന്ന ഇംഗ്ലീഷ്-ഹിന്ദി ചിത്രവും അദ്ദേഹം സംവിധാനം ചെയ്തു. 2011ലെ ജനീവ ഇന്റർനാഷണൽ ഫിലിം ഫെസ്റ്റിവലിൽ മികച്ച നറേറ്റീവ് ഫീച്ചർ ഫിലിമിനുള്ള പുരസ്കാരം ചിത്രത്തിന് ലഭിച്ചു.

ഭോപ്പാൽ ദുരന്തത്തെ ആസ്പദമാക്കി ഒരുക്കിയ 'ബറിയൽ ഓഫ് ഡ്രീംസ്' ദേശീയ ശ്രദ്ധ നേടിയിരുന്നു. ഡോക്യുമെന്ററികളിലും ഹ്രസ്വചിത്രങ്ങളിലും ഫീച്ചർ സിനിമകളിലും സാമൂഹികവും സാംസ്കാരികവുമായ വിഷയങ്ങളെ വേറിട്ട കാഴ്ചപ്പാടിൽ അവതരിപ്പിക്കാൻ ആർ ശരത് ശ്രമിച്ചു.

സിനിമയ്ക്കപ്പുറവും കേരളത്തിന്റെ സാമൂഹിക, സാംസ്കാരിക മേഖലകളിൽ സജീവ സാന്നിധ്യമായിരുന്നു. 'ഫ്രീഡം ഫ്രണ്ട്സ്' എന്ന ഇംഗ്ലീഷ് ചിത്രത്തിന്റെ പ്രവർത്തനങ്ങൾ നടന്നുവരുന്നതിനിടെയാണ് മരണം. കഥാകൃത്ത്, തിരക്കഥാകൃത്ത് എന്നീ നിലകളിലും അദ്ദേഹം വ്യക്തിമുദ്ര പതിപ്പിച്ചു. കെഐ ബിന്ദുവാണ് ഭാര്യ. മക്കൾ: അഭിജിത്ത് ശരത്ത്, അഭിരാം ശരത്ത്. മരുമക്കൾ: അഞ്ചലി, അഭിരാമി. ചെറുമകൻ: ദേവ് ദത്ത്.