കുതിപ്പിൽ പൊതുമേഖലാ സ്ഥാപനങ്ങൾ ; 24 സ്ഥാപനം ലാഭത്തിൽ , വിറ്റുവരവ്‌ 5119.18 കോടി

തിരുവനന്തപുരം : സംസ്ഥാന വ്യവസായ വകുപ്പിനു കീഴിലെ പൊതുമേഖലാ സ്ഥാപനങ്ങൾ ഈ സാമ്പത്തിക വർഷം റെക്കോഡ്‌ വളർച്ചയിൽ. ലാഭത്തിൽ പ്രവർത്തിക്കുന്ന സ്ഥാപനങ്ങളുടെ എണ്ണം 18ൽനിന്ന് 24 ആയി. സഞ്ചിത പ്രവർത്തന ലാഭം 134.56 കോടി രൂപയായും വർധിച്ചു. മുൻ സാമ്പത്തിക വർഷം രേഖപ്പെടുത്തിയ 76.16 കോടിയുടെ നഷ്ടം മറികടന്നാണ് ഈ കുതിപ്പ്‌. മൊത്തം വാർഷിക വിറ്റുവരവ്‌ 4419 കോടിയിൽനിന്ന് 5119.18 കോടിയുമായി. 15.82 ശതമാനമാണ് വർധനവെന്നും വ്യവസായ വകുപ്പിനുകീഴിലുള്ള 48 പൊതുമേഖലാസ്ഥാപനങ്ങളുടെ പ്രകടനം വിലയിരുത്തി ബോർഡ് ഫോർ പബ്ലിക്‌ സെക്ടർ ട്രാൻസ്ഫർമേഷൻ തയ്യാറാക്കിയ റിപ്പോർട്ടിൽ പറ
യുന്നു.

സ്വയംഭരണ സ്ഥാപനങ്ങളായ കിൻഫ്രയും കെഎസ്ഐഡിസിയും മികച്ച ലാഭം നേടി. കിൻഫ്ര 88.41 കോടിയുടെ വരുമാനവും 7.19 കോടിയുടെ ലാഭവുമുണ്ടാക്കി. വായ്പ, ഇക്വിറ്റി ഇനങ്ങളിലായി കെഎസ്ഐഡിസി 456.49 കോടി രൂപ വ്യവസായ സ്ഥാപനങ്ങൾക്ക് നൽകി. 61.81 കോടി രൂപയുടെ ലാഭവും നേടി.

കെൽട്രോൺ 50വർഷത്തെ ചരിത്രത്തിൽ ആദ്യമായി 1056.94 കോടി രൂപയുടെ വിറ്റുവരവ് നേടി. ഏറ്റവുമധികം പ്രവർത്തനലാഭമുണ്ടാക്കിയത് കെഎംഎംഎൽ ആണ്. 107. 67 കോടി. കെൽട്രോൺ 50.54 കോടി രൂപയുടെ പ്രവർത്തന ലാഭമുണ്ടാക്കി. ടിസിസി, കെൽ, കേരളാ സിറാമിക്സ്, ട്രിവാൻഡ്രം സ്‌പിന്നിങ്‌ മിൽ, കയർ മെഷിനറി സ്ഥാപനങ്ങൾ ലാഭത്തിലായി. 32 കമ്പനികളുടെ വാർഷിക വിറ്റുവരവിൽ വർധനവുണ്ട്‌. കേന്ദ്ര സർക്കാർ അടച്ചുപൂട്ടിയതിനെ തുടർന്ന് കേരളം ഏറ്റെടുത്ത വെള്ളൂർ കെപിപിഎല്ലിന്റെ നഷ്ടം 17.31 കോടിയിൽനിന്ന് 2.26 കോടിയായി കുറഞ്ഞു.

ലാഭമുണ്ടാക്കിയ 
മറ്റ് സ്ഥാപനങ്ങൾ

ടെൽക്ക്, കെൽട്രോൺ ഇലക്ട്രോ സിറാമിക്സ്, കെഎസ്ഐഇ, കെൽട്രോൺ കംപോണന്റ്‌സ്‌, സ്റ്റീൽ ആൻഡ്‌ ഇന്റസ്ട്രിയൽ ഫോർജിങ്‌സ്‌, കയർ കോർപ്പറേഷൻ, ടിസിസി, കേരള ഇലക്ട്രിക്കൽ ആൻഡ്‌ അലൈഡ് എൻജിനീയറിങ്‌, സ്റ്റീൽ ഇൻഡസ്ട്രീസ്, ക്ലേയ്സ് ആൻഡ്‌ സിറാമിക്സ്, കെഎസ്ഡിപി, ആർട്ടിസാൻസ് ഡവലപ്മെന്റ്‌ കോർപ്പറേഷൻ, എഫ്ഐടി, കാഷ്യൂ ബോർഡ്, ഫോം മാറ്റിങ്‌സ്‌, മെറ്റൽ ഇൻഡസ്ട്രീസ്, കേരളാ സിറാമിക്സ്, ട്രിവാൻഡ്രം സ്പിന്നിങ്‌ മിൽസ്, കയർ മെഷിനറി മാനുഫാക്ചറിങ്‌ കമ്പനി.