വൈദ്യുത സ്വകാര്യവൽക്കരണത്തിനെതിരെ പ്രക്ഷോഭം ഉയരണം: ‌തപൻ സെൻ

തിരുവനന്തപുരം: വൈദ്യുതി സ്വകാര്യവൽക്കരണത്തിനെതിരെ ജനകീയ പ്രക്ഷോഭം ഉയരണമെന്ന്‌ സിഐടിയു അഖിലേന്ത്യ ജനറൽ സെക്രട്ടറി തപൻ സെൻ പറഞ്ഞു. ഇലക്‌ട്രിസിറ്റി എംപ്ലോയീസ് ഫെഡറേഷൻ ഓഫ് ഇന്ത്യയുടെ അഖിലേന്ത്യ സമ്മേളനം ബാലനന്ദൻ ജന്മശതാബ്‌ദി നഗറിൽ (ആർഡിആർ കൺവൻഷൻ സെന്റർ) ഉദ്‌ഘാടനം ചെയ്യുകയായിരുന്നു അദ്ദേഹം.

നവ ഉദാരവൽക്കരണനയത്തിന്റെ ഭാഗമായി കേന്ദ്രസർക്കാർ വൈദ്യുതി നിയമ ഭേദഗതി തുടർച്ചയായി പാർലമെന്റിൽ അവതരിപ്പിക്കുന്നു. ഇതിനിടയിലാണ്‌ സ്‌മാർട്ട് മീറ്റർ വ്യാപനത്തിനായി പ്രത്യേക പദ്ധതി കേന്ദ്രം രൂപീകരിക്കുന്നത്. ഇതിനെതിരായ പ്രതിരോധ പ്രവർത്തനം മുഴുവൻ സംസ്ഥാനങ്ങളിലേക്കും വ്യാപിപ്പിക്കണമെന്നും അദ്ദേഹം പറഞ്ഞു.

സമ്മേളനത്തിൽ ട്രേഡ് യൂണിയൻ ഇന്റർനാഷണൽ (എനർജി) നേപ്പാൾ ഘടകത്തിന്റെ നേതാവ് രമേശ്വർ പൗദൽ, ഓൾ ഇന്ത്യ കോൾ വർക്കേഴ്സ് ഫെഡറേഷൻ നേതാക്കളായ ജി കെ ശ്രീവാസ്‌തവ, മാനസ് മുഖർജി, പെട്രോളിയം ആൻഡ് ഗ്യാസ് വർക്കേഴ്സ് ഫെഡറേഷൻ ഓഫ് ഇന്ത്യ ഭാരവാഹികളായ ന്യൂജൻ ചുട്ടിയ, പ്രദീപ് മയേക്കാർ, ന്യൂക്ലിയർ പവർ കോർപറേഷൻ യൂണിയൻ ജനറൽ സെക്രട്ടറി ജീ ദീനദയാലൻ, പവർ ഗ്രിഡ് വർക്കേഴ്സ് യൂണിയൻ നേതാവ് കെ അരസു, എൻടിപിസി നേതാവ് അപൂർബകുമാർ ദാസ്, ഓൾ ഇന്ത്യ ഫെഡറേഷൻ ഇലക്‌ട്രിസിറ്റി എംപ്ലോയീസ് ജനറൽ സെക്രട്ടറി മോഹൻ ശർമ എന്നിവർ സംസാരിച്ചു. വിവിധ സംസ്ഥാനങ്ങളിൽനിന്നായി 375ൽ അധികം പ്രതിനിധികൾ പങ്കെടുത്തു.