പിഎം ശ്രീയുടെ പേരിൽ കേന്ദ്രം തടഞ്ഞത്‌ 1500 കോടി

തിരുവനന്തപുരം : പൊതുവിദ്യാഭ്യാസ മേഖലയിൽ കേന്ദ്രം സംസ്ഥാനത്തിന്‌ നൽകാനുള്ള കുടിശ്ശിക 1,500.27 കോടി രൂപ. ഭിന്നശേഷി വിദ്യാർഥികളുടെ പഠനത്തിനുൾപ്പെടെ സമഗ്രശിക്ഷാ കേരള (എസ്‌എസ്‌കെ) പദ്ധതി വിഹിതമായി ഭരണഘടനാപരമായി അനുവദിക്കേണ്ട തുകയാണിത്‌. പിഎം ശ്രീ പദ്ധതി കേരളത്തിൽ നടപ്പാക്കാത്തതിന്റെ പേരിലാണ്‌ കേന്ദ്രത്തിന്റെ ഈ രാഷ്‌ട്രീയക്കളി.

എസ്‌എസ്‌കെ പദ്ധതിയിൽ 2023-–-24 അവസാന രണ്ടുഗഡു ഉൾപ്പെടെ തടഞ്ഞുവച്ചിരിക്കുകയാണ്‌. കഴിഞ്ഞ സാമ്പത്തിക വർഷം സംസ്ഥാനത്തിന്‌ അവകാശപ്പെട്ട 513.54 കോടി രൂപയിൽ ഒരുരൂപ പോലും ലഭിച്ചില്ല. കേരളത്തിലെ 336 സ്‌കൂളിനെ പിഎം ശ്രീ സ്‌കൂളുകളായി മാറ്റണമെന്നാണ്‌ കേന്ദ്ര നിർദ്ദേശം. ഒരു ബിആർസിയിൽ രണ്ടു സ്‌കൂൾ ഇത്തരത്തിൽ മാറ്റി കേന്ദ്ര ബ്രാൻഡിങ്‌ നടത്തണം. കേരളം 2023–-24 സാമ്പത്തിക വർഷത്തെ അവസാന ഗഡുക്കൾക്കുള്ള രേഖകൾ സമർപ്പിച്ചിട്ടും ഫണ്ട് അനുവദിച്ചിരുന്നില്ല.

അന്വേഷിച്ചപ്പോഴാണ്‌ പിഎം ശ്രീ പദ്ധതിയുടെ ധാരണപത്രത്തിൽ ഒപ്പുവയ്‌ക്കാമെന്ന ഉറപ്പു നൽകണമെന്ന് കേന്ദ്ര വിദ്യാഭ്യാസ മന്ത്രാലയം ആവശ്യപ്പെട്ടത്. പിഎം ശ്രീ പദ്ധതി 2020ലെ ദേശീയ വിദ്യാഭ്യാസ നയത്തിലുള്ളതാണ്‌. കേരളം ഇത്‌ നടപ്പാക്കിയിട്ടില്ല. എങ്കിലും കേരളത്തിലെ കുട്ടികൾക്ക് ലഭിക്കാനുള്ള ആനുകൂല്യങ്ങൾ നഷ്ടപ്പെടാതിരിക്കാനുള്ള ശ്രമത്തിലാണ്‌ സംസ്ഥാന സർക്കാർ. കഴിഞ്ഞദിവസം ന്യൂഡൽഹിയിൽ നടന്ന കൂടിക്കാഴ്‌ചയിൽ കേന്ദ്ര വിദ്യാഭ്യാസമന്ത്രി ധർമ്മേന്ദ്ര പ്രധാന്‌, മന്ത്രി വി ശിവൻകുട്ടി കേന്ദ്രാവിഷ്‌കൃത പദ്ധതികളുടെ വിഹിതം ലഭ്യമാക്കുന്നതിന്‌ നിവേദനം നൽകിയിരുന്നു.

വെല്ലുവിളിയാകും ഇവയ്‌ക്ക്‌

● സൗജന്യ യൂണിഫോം 
● സൗജന്യ പാഠപുസ്തകം 
● കോംപോസിറ്റ് സ്കൂൾ ഗ്രാന്റ് ● സ്കൂൾ ലൈബ്രറി ഗ്രാന്റ് 
● സ്പോർട്സ് ഗ്രാന്റ് 
● ഭിന്നശേഷി കുട്ടികൾക്കുള്ള ഗ്രാന്റുകളും പെൺകുട്ടികൾക്കുള്ള സ്റ്റൈപെന്റും, ഭിന്നശേഷി കുട്ടികൾക്കുള്ള മെഡിക്കൽ സഹായ ഉപകരണങ്ങൾ, തെറാപ്പി സേവനങ്ങൾ 
● സോഷ്യൽ ഇൻക്ലൂഷൻ പദ്ധതി 
● ഗൃഹാധിഷ്ഠിത വിദ്യാഭ്യാസം 
● സമഗ്ര ഗുണമേന്മ 
വിദ്യാഭ്യാസ പദ്ധതി 
● പെൺകുട്ടികളുടെ 
ശാക്തീകരണം 
● റസിഡൻഷ്യൽ ഹോസ്‌റ്റൽ പ്രവർത്തനങ്ങൾ 
● പ്രീ-സ്കൂൾ കുട്ടികൾക്കുള്ള പുസ്‌തകങ്ങളും വർക്ക്ബുക്കുകളും പ്രവർത്തന ഇടങ്ങളും 
● അധ്യാപക വിദ്യാഭ്യാസം 
● സ്പെഷ്യലിസ്‌റ്റ്‌ അധ്യാപകരുടെയും സ്പെഷ്യൽ എഡ്യുക്കേറ്റർമാരുടെയും വിദ്യാ 
വളന്റിയർമാരുടെയും ശമ്പളം 
● രക്ഷാകർതൃ വിദ്യാഭ്യാസം 
● അധ്യാപക പരിശീലനം 
● ജീവനക്കാരുടെ ശമ്പളം