രാജ്യത്ത് ഭീതി നിലനിൽക്കുന്നു : പ്രബീർ പുർകായസ്ത

തിരുവനന്തപുരം

യഥാർഥ ജർമൻകാർ ആരെന്നും അല്ലെന്നുമുള്ള ചോദ്യമാണ് നാസി ജർമനിയിൽ ഉണ്ടായിരുന്നതെന്നും ആരാണ് ഇന്ത്യക്കാരെന്നും അല്ലാത്തവരെന്നുമുള്ള ചോദ്യമാണ് ഇന്ന്‌ കേൾക്കുന്നതെന്നും ന്യൂസ്‌ക്ലിക്ക്‌ എഡിറ്റർ പ്രബീർ പുർകായസ്ത. ഏത്‌ തരത്തിലുള്ള രാജ്യം കെട്ടിപ്പടുക്കണമെന്നാണ് ഇന്ന്‌ രാജ്യം നേരിടുന്ന വെല്ലുവിളി. രാജ്യത്ത് ഭീതി നിലനിൽക്കുന്നു. സർക്കാരിനെ വിമർശിക്കുന്നവർ ജയിലിലടയ്ക്കപ്പെടുന്നു.

കോളനിവൽക്കരണത്തെയും സ്വാതന്ത്ര്യലബ്ധിക്കുശേഷം വിഭജനശക്തികളെയും അടിയന്തരാവസ്ഥയെയുമൊക്കെ നേരിട്ട ഇന്ത്യൻ ജനതയ്ക്ക് ഇന്നത്തെ സാഹചര്യവും നേരിടാനാവുമെന്നും പുർകായസ്‌ത പറഞ്ഞു. എ കെ ജി പഠനഗവേഷണകേന്ദ്രം സംഘടിപ്പിച്ച അടിയന്തരാവസ്ഥ 50–-ാം വാർഷികത്തിൽ സംസാരിക്കുകയായിരുന്നു അദ്ദേഹം. കോളനിവാഴ്ചക്കെതിരെയുള്ള സമരങ്ങളിലൂടെ രൂപപ്പെട്ടതാണ് ഇന്ത്യയുടെ ഐക്യം. ഈ സ്വാതന്ത്ര്യസമരത്തിലൂടെ ഉയര്‍ന്നുവന്നതാണ് നമ്മുടെ സ്വത്വം.

ദേശീയപ്രസ്ഥാനത്തിന്റെ മൂല്യങ്ങളെ അടിസ്ഥാനമാക്കിയുള്ള ഭരണഘടനയ്ക്കും നാം രൂപം നല്‍കി. അടിയന്തരാവസ്ഥ പ്രഖ്യാപിച്ചപ്പോള്‍ ഇന്ത്യയിലെ മധ്യവര്‍ഗം സന്തോഷത്തിലായിരുന്നു. അവര്‍ ഭരണകൂടത്തിനൊപ്പമായിരുന്നു. ജനങ്ങളെ വിശ്വാസത്തിലെടുക്കണമെന്നാണ് രാഷ്ട്രീയനേതൃത്വത്തെ അടിയന്തരാവസ്ഥ പഠിപ്പിച്ച പാഠം.

രാജ്യത്തെ ജനങ്ങള്‍ പോഷകാഹാരമില്ലായ്മയും വിദ്യാഭ്യാസത്തിന്റെ അഭാവവുമൊക്കെ നേരിടുമ്പോള്‍ രാജ്യം സാമ്പത്തികശക്തിയാവുന്നുവെന്ന് സര്‍ക്കാര്‍ അവകാശപ്പെടുന്നു. അപ്പോള്‍ പണമൊക്കെ എവിടെപ്പോവുന്നു. വന്‍കിട സമ്പന്നര്‍ക്കുവേണ്ടിയുള്ളതാണ് കേന്ദ്രഭരണം. സമ്പന്നര്‍ ദരിദ്രജനതയുടെ ജീവിതത്തെയും ശാക്തീകരിക്കുമെന്നാണ് കേന്ദ്രസർക്കാരിന്റെ വാദമെന്നും അദ്ദേഹം പറഞ്ഞു.