ഇടുക്കിയിൽ വീണ്ടും കാട്ടാന ആക്രമണം; പൂപ്പാറ സ്വദേശിക്ക് ദാരുണാന്ത്യം

തിരുവനന്തപുരം : സംസ്ഥാനത്ത് വീണ്ടും കാട്ടാന ആക്രമണത്തിൽ ഒരു മരണം. ഇടുക്കി പൂപ്പാറ സ്വദേശി പി വി വിജയനാണ് മരിച്ചത്. ചക്കക്കൊമ്പനാണ് ആക്രമിച്ചതെന്ന് പ്രദേശവാസികൾ പറഞ്ഞു. രാവിലെ പണിസ്ഥലത്ത് നിന്ന് വീട്ടിലേക്ക് വരുന്ന വഴി കാട്ടാനയുടെ മുന്നിൽപ്പെടുകയായിരുന്നു.

ഇന്ന് പുലർച്ചെ ശാന്തൻപാറക്ക് സമീപം പന്തടികളത്തിലാണ് സംഭവം. പണിസ്ഥലത്തെ ഷെഡിൽ നിന്ന് വീട്ടിലേക്ക് നടന്നു പോവുകയായിരുന്നു. ശബ്ദം കേട്ടെത്തിയ നാട്ടുകാർ വിജയനെ ആശുപത്രിയിലെത്തിക്കാൻ ശ്രമിച്ചെങ്കിലും അപ്പോഴേക്കും മരണപ്പെട്ടു. ഇന്ന് രാവിലെ പ്രദേശത്ത് കാട്ടാന ഇറങ്ങിയിട്ടുണ്ടെന്ന് വാട്സ്ആപ്പിലൂടെ അറിയിച്ചിരുന്നെങ്കിലും പലർക്കും ഇത്തരം ആധുനിക സംവിധാനങ്ങളില്ല. പ്രദേശത്ത് കഴിഞ്ഞ നാല് മാസത്തിനിടെ കാട്ടാന ആക്രമണത്തിൽ കൊല്ലപ്പെടുന്ന നാലാമത്തെ ആളാണ് വിജയൻ.