യുകെ വിസ വാഗ്ദാനം: 11 ലക്ഷം തട്ടിയയാൾ അറസ്റ്റിൽ

ഇരിട്ടി (കണ്ണൂർ): യുകെയിലേക്ക് വിസ വാഗ്ദാനംനൽകി എടത്തൊട്ടി സ്വദേശിയിൽനിന്ന്‌ 11.32 ലക്ഷം തട്ടിയ കേസിൽ കൊല്ലത്തെ ബിസിനസ്സുകാരനെ മുഴക്കുന്ന് പൊലീസ് നെടുമ്പാശേരി വിമാനത്തവളത്തിൽ അറസ്റ്റുചെയ്തു. കൊല്ലം ലക്ഷ്മിനഗർ സ്വദേശി ഷാൻ മൻസിലിൽ ഷാൻ സുലൈമാനാണ് (41) പിടിയിലായത്‌. വിദേശത്തുനിന്ന്‌ തിരിച്ചുവരുന്നതിനിടെ നെടുമ്പാശേരി വിമാനത്തവളത്തിലിറങ്ങിയപ്പോൾ പ്രതിയെ മുഴക്കുന്ന് എസ്ഐ എൻ വിപിനും സംഘവുമാണ്‌ പിടികൂടിയത്‌.

യുകെയിൽ ജോലി വാഗ്ദാനംചെയ്ത് വിവിധ ഘട്ടങ്ങളിലായി ബാങ്ക് അക്കൗണ്ടുവഴി 11. 32 ലക്ഷം രൂപ വാങ്ങിയ കേസിലാണ് അറസ്റ്റ്. 2022ലാണ്‌ കേസിനാസ്പദമായ സംഭവം. പലതവണ അവധിപറയുകയും വിസ നൽകാതെ വഞ്ചിക്കുകയുമായിരുന്നു. പണം തിരികെക്കിട്ടാൻ സമീപിച്ചെങ്കിലും നാലു ലക്ഷം രൂപ മാത്രമാണ്‌ തിരിച്ചു നൽകിയത്‌. ഉദ്യോഗാർഥി നോർക്ക സെല്ലിൽ പരാതി നൽകി. നോർക്ക സെൽ വഴിയാണ് മുഴക്കുന്ന് പൊലീസ് കേസ്‌ ഏറ്റെടുത്തത്‌. അന്വേഷണം നടത്തുന്നതിനിടെ പ്രതി വിദേശത്തേക്ക് കടന്നു. പ്രതിക്കായി ലുക്ക് ഔട്ട് നോട്ടീസ് ഇറക്കിയിരുന്നു.

വിസ നൽകാമെന്നു പറഞ്ഞ് ഇയാൾ പലരിൽനിന്നും പണം വാങ്ങിയതായി പൊലീസ് പറഞ്ഞു. എറണാകുളം വൈറ്റിലയിൽ പ്രവർത്തിക്കുന്ന സെവൻ എസ്‌ സ്പൈസസ്‌ ഉടമയാണ് ഷാൻ. ഇയാളെ മട്ടന്നൂർ കോടതി റിമാൻഡുചെയ്തു.