പ്രാഥമിക ആരോഗ്യ കേന്ദ്രത്തിൽ 2.3 ലക്ഷത്തിന്റെ പണാപഹരണം; മുൻ യു ഡി ക്ലർക്കിന്‌ 32 വർഷം കഠിനതടവ്‌

മലപ്പുറം: പ്രാഥമിക ആരോഗ്യ കേന്ദ്രത്തിൽ ശമ്പള ബില്ലുകളിലും മറ്റും തിരിമറി നടത്തി പണാപഹരണം നടത്തിയതിന് മുൻ യു ഡി ക്ലർക്കിനെ 32 വർഷത്തേക്ക്‌ ശിക്ഷിച്ചു. കോഴിക്കോട്‌ വിജിലൻസ്‌ കോടതിയുടേതാണ്‌ വിധി. 1,40,000 രൂപ പിഴ ഒടുക്കാനും യു ഡി ക്ലർക്കായിരുന്ന സി നാസിറിനോട്‌ കോടതി ആവശ്യപ്പെട്ടിട്ടുണ്ട്‌.

മലപ്പുറത്തെ നെടിയിരുപ്പ് പ്രാഥമിക ആരോഗ്യ കേന്ദ്രത്തിൽ 2004-2006 കാലഘട്ടത്തിൽ ജോലി ചെയ്ത സമയത്താണ്‌ നാസിർ 2,31,767 രൂപയുടെ പണാപഹരണം നടത്തിയത്‌. ആരോഗ്യ കേന്ദ്രത്തിൽ ജീവനക്കാരുടെ ശമ്പളം, മറ്റ് ആനുകൂല്യങ്ങൾ എന്നിവയുടെ ബില്ലുകൾ തയ്യാറാക്കല്‍, തുക വിതരണം തുടങ്ങിയവയുമായി ബന്ധപ്പെട്ട ചുമതലകൾ വഹിക്കുമ്പോൾ നാസിർ തിരുമറി നടത്തുകയായിരുന്നു.

മലപ്പുറം വിജിലൻസ് യൂണിറ്റ് രജിസ്റ്റർ ചെയ്ത് അന്വേഷണം പൂർത്തിയാക്കിയ കേസിലാണ്‌ നാസിർ കുറ്റക്കാരനാണെന്ന് കോഴിക്കോട് വിജിലൻസ് കോടതി കണ്ടെത്തിയത്‌. ശിക്ഷകൾ ഒരുമിച്ചനുഭവിച്ചാൽ മതിയെന്നും വിധിന്യായത്തിൽ പറയുന്നുണ്ട്‌. കോഴിക്കോട് വിജിലൻസ് ജഡ്ജ് ഷിബു തോമസാണ് വിധി പുറപ്പെടുവിച്ചത്. വിജിലൻസിന് വേണ്ടി പബ്ലിക് പ്രോസിക്യൂട്ടർ കെ അരുൺ നാഥ് ഹാജരായി.

പൊതുജനങ്ങളുടെ ശ്രദ്ധയിൽ അഴിമതി സംബന്ധിച്ച വിവരങ്ങൾ ലഭിക്കുകയാണെങ്കിൽ വിജിലൻസിന്റെ ടോൾ ഫ്രീ നമ്പരായ 1064 എന്ന നമ്പരിലോ 8592900900 എന്ന നമ്പരിലോ വാട്ട്സ്ആപ്പ് നമ്പരായ 9447789100 എന്ന നമ്പരിലോ അറിയിക്കണമെന്ന് വിജിലൻസ് ഡയറക്ടർ മനോജ് എബ്രഹാം ഐ.പി.എസ് അഭ്യർത്ഥിച്ചു.