പാരാഗ്ലൈഡിങ്, മൗണ്ടെയ്ൻ സൈക്ലിങ്‌; സാഹസിക വിനോദസഞ്ചാരത്തിനൊരുങ്ങി കേരളം

തിരുവനന്തപുരം: സാഹസിക വിനോദസഞ്ചാരത്തിന് അനുയോജ്യമായ പ്രദേശമായി കേരളത്തെ അടയാളപ്പെടുത്തുന്നതിനായി മൂന്ന് അന്താരാഷ്ട്ര ചാമ്പ്യൻഷിപ്പുകൾ ടൂറിസം വകുപ്പ് സംഘടിപ്പിക്കുന്നു. സംസ്ഥാനത്ത് നടക്കുന്ന സാഹസിക വിനോദസഞ്ചാര മത്സരങ്ങൾക്കായി തയ്യാറാക്കിയിട്ടുള്ള കലണ്ടറിന് അനുസൃതമായിട്ടാണ് ഈ വർഷത്തെ മത്സരങ്ങൾ സംഘടിപ്പിക്കുക.

ചാമ്പ്യൻഷിപ്പുകളിൽ ആദ്യത്തേതായ ഇന്റർനാഷണൽ സർഫിങ് ഫെസ്റ്റിവൽ ഫെബ്രുവരി 27, 28 മാർച്ച് ഒന്ന് തീയതികളിൽ വർക്കലയിൽ നടക്കും. രണ്ടാമത് ഇന്റർനാഷണൽ പാരാഗ്ലൈഡിങ് ഫെസ്റ്റിവെലിന് മാർച്ച് 19 മുതൽ 23 വരെ വാഗമൺ വേദിയാകും. മൗണ്ടെയ്ൻ സൈക്ലിങ് മത്സരത്തിന്റെ ആഗോള ഭൂപടത്തിൽ കേരളത്തിന് ഇടം നേടിക്കൊടുത്ത ഇൻറർനാഷണൽ മൗണ്ടെയ്ൻ സൈക്ലിങ് ചാമ്പ്യൻഷിപ്പിന്റെ (എംടിബി കേരള-2025) എട്ടാം പതിപ്പ് മാർച്ച് 28 മുതൽ 30 വരെ വയനാട് മാനന്തവാടിയിലെ പ്രിയദർശിനി ടീ പ്ലാൻറേഷനിൽ നടത്തും.

പാരാഗ്ലൈഡിങ്, സർഫിങ്, മൗണ്ടെയ്ൻ സൈക്ലിങ് എന്നീ സാഹസിക വിനോദങ്ങളിൽ അന്താരാഷ്ട്ര മത്സരങ്ങൾ സംഘടിപ്പിക്കുന്നതിലൂടെ സംസ്ഥാനത്തെ അഡ്വഞ്ചർ ടൂറിസം സാധ്യതകൾ ലോകത്തിനു മുന്നിൽ എത്തിക്കാൻ സാധിക്കുമെന്ന് മന്ത്രി പി എ മുഹമ്മദ് റിയാസ് പറഞ്ഞു. സർഫിങ് കായിക വിനോദത്തെ പ്രോത്സാഹിപ്പിക്കുകയും കേരളത്തെ പ്രധാന സർഫ് ഡെസ്റ്റിനേഷനാക്കുകയുമാണ് സർഫിങ് ചാമ്പ്യൻഷിപ്പിന്റെ ലക്ഷ്യം. ഇന്ത്യയിലെ ഏറ്റവും വലിയ എയ്റോ സ്പോർട്സ് അഡ്വഞ്ചർ ഫെസ്റ്റവെലായ പാരാഗ്ലൈഡിങ് ഫെസ്റ്റിവെൽ വാഗമണിന്റെ സാഹസിക വിനോദസഞ്ചാര സാധ്യതകളെ അന്താരാഷ്ട്ര ശ്രദ്ധയിൽ കൊണ്ടുവരും. ലോകമെമ്പാടുമുള്ള സൈക്ലിങ് പ്രേമികളെ കേരളത്തിലേക്ക് ആകർഷിക്കാൻ എംടിബിയുടെ കഴിഞ്ഞ എഡിഷനുകൾക്ക് സാധിച്ചു. ഇത്തവണ ആഗോള തലത്തിൽ കൂടുതൽ മികച്ച മുന്നേറ്റമുണ്ടാക്കാൻ ഈ ചാമ്പ്യൻഷിപ്പിനാകുമെന്നും മന്ത്രി കൂട്ടിച്ചേർത്തു.

സർഫിങ്

2025 കലണ്ടർ വർഷത്തെ ആദ്യത്തെ ദേശീയ സർഫിങ് ചാമ്പ്യൻഷിപ്പ് ആണ് വർക്കലയിൽ നടക്കുന്നത്. ഇന്ത്യയിൽ നിന്നുള്ള സർഫിങ് അത്ലറ്റുകൾ വിവിധ വിഭാഗങ്ങളിൽ മത്സരിക്കും. എസ് യുപി ടെക്നിക്കൽ റേസ്, പാഡിൽബോർഡ് ടെക്നിക്കൽ റേസ്, എസ് യുപി സർഫിങ് എന്നീ വിഭാഗങ്ങളിലാണ് മത്സരങ്ങൾ. കേരള അഡ്വഞ്ചർ ടൂറിസം പ്രൊമോഷൻ സൊസൈറ്റി (കെഎടിപിഎസ്), തിരുവനന്തപുരം ഡിടിപിസിയുമായി സഹകരിച്ച് സർഫിങ് ഫെഡറേഷൻ ഓഫ് ഇന്ത്യ, അന്താരാഷ്ട്ര സർഫിങ് അസോസിയേഷൻ എന്നിവരുടെ സാങ്കേതിക പിന്തുണയോടെയാണ് പരിപാടി സംഘടിപ്പിക്കുന്നത്.

വാട്ടർ സ്പോർട്സ് പ്രേമികൾക്ക് സർഫിങ് കായിക വിനോദം അടുത്ത് പരിചയപ്പെടാനും ആസ്വദിക്കാനുമുള്ള അവസരം ഈ ഫെസ്റ്റിവൽ നൽകും. വർക്കലയെ അന്തർദേശീയ സർഫിങ് ഡെസ്റ്റിനേഷനാക്കി മാറ്റാനും ചാമ്പ്യൻഷിപ്പിലൂടെ ടൂറിസം വകുപ്പ് ലക്ഷ്യമിടുന്നു. സർഫിങ്ങിൽ തുടക്കക്കാർക്കും വിദഗ്ധർക്കും പരിശീലിക്കുന്നതിനുള്ള സൗകര്യം വർക്കല ബീച്ചിലുണ്ട്. നിരവധി വിദേശ, ഇതര സംസ്ഥാന വിനോദ സഞ്ചാരികൾ വർക്കലയിൽ സർഫിങ് ചെയ്യാൻ എത്തിച്ചേരുന്നു.

പാരാഗ്ലൈഡിങ്

വാഗമണിലെ ഇന്റർനാഷണൽ പാരാഗ്ലൈഡിങ് ഫെസ്റ്റിവെലിൽ ലോകപ്രശസ്ത റൈഡർമാരും അന്താരാഷ്ട്ര ചാമ്പ്യൻമാരും ഭാഗമാകും. 75 മത്സരാർത്ഥികൾക്കായി നിജപ്പെടുത്തിയ മത്സരത്തിൽ 40ൽപരം വിദേശ ഗ്ലൈഡർമാർ മത്സരിക്കും. 25-ലധികം രാജ്യങ്ങൾ പങ്കെടുക്കാൻ താൽപ്പര്യം പ്രകടിപ്പിച്ചിട്ടുണ്ട്. ഫ്രാൻസ്, ജർമനി, ഇറ്റലി, ന്യൂസിലാന്റ്, ഓസ്ട്രേലിയ, യുഎസ്, യുകെ, നേപ്പാൾ, ബെൽജിയം, സ്പെയിൻ, സ്വിറ്റ്സർലാൻഡ്, തുർക്കി, ബ്രസീൽ, ജോർജിയ, മലേഷ്യ, തായ് ലാൻഡ്, ഭൂട്ടാൻ, പെറു, ചെക്ക് റിപ്പബ്ലിക്, നോർവേ, സ്വീഡൻ, കാനഡ, ഡെൻമാർക്ക് തുടങ്ങിയ രാജ്യങ്ങളിൽ നിന്നും ഡൽഹി, ഹിമാചൽ പ്രദേശ്, മഹാരാഷ്ട്ര, കർണാടക, തമിഴ് നാട്, ഡൽഹി, ഗോവ, സിക്കിം, ഉത്തരാഖണ്ഡ്, അരുണാചൽ പ്രദേശ് എന്നിവിടങ്ങളിൽ നിന്നുമുള്ള മത്സരാർത്ഥികളുടെ പങ്കാളിത്തം ഫെസ്റ്റിവെലിൽ ഉണ്ടാകും.

വാഗമൺ ഇന്റർനാഷണൽ അക്യുറസി കപ്പ് 2025 പാരാഗ്ലൈഡിങ്ങിലെ മികച്ച ലാൻഡിങ് കൃത്യത പ്രദർശിപ്പിക്കുകയും സാഹസിക വിനോദസഞ്ചാരത്തിൽ കേരളത്തെ മുൻനിരയിലേക്ക് ഉയർത്തുകയും ചെയ്യുന്ന ലോകത്തിലെ ആദ്യത്തെ ഇവന്റാണ്. ഇതിൽ ലോകമെമ്പാടുമുള്ള പാരാഗ്ലൈഡിങ് പൈലറ്റുമാരെ അവതരിപ്പിക്കും. ഈ മത്സരം അന്താരാഷ്ട്ര പങ്കാളികളെയും കാണികളെയും ആകർഷിക്കും. സംസ്ഥാനത്തിൻറെ ടൂറിസം വ്യവസായത്തിലേക്ക് ശ്രദ്ധയും നിക്ഷേപവും ഇത് സാധ്യമാക്കും. കെഎടിപിഎസും ഇടുക്കി ഡിടിപിസിയും സംയുക്തമായി ഫെഡറേഷൻ എയറോനോട്ടിക് ഇൻറർനാഷണൽ, എയ്റോ ക്ലബ് ഓഫ് ഇന്ത്യ, ഓറഞ്ച് ലൈഫ് പാരാഗ്ലൈഡിങ് സ്കൂൾ ഇന്ത്യ എന്നിവയുടെ സാങ്കേതിക പിന്തുണയോടെയാണ് ഫെസ്റ്റിവെൽ സംഘടിപ്പിക്കുന്നത്.

മൗണ്ടെയ്ൻ സൈക്ലിങ്

25 രാജ്യങ്ങളിൽ നിന്നുള്ള സൈക്ലിസ്റ്റുകളെയാണ് എംടിബി കേരള-2025 ചാമ്പ്യൻഷിപ്പിൽ പ്രതീക്ഷിക്കുന്നത്. ഇന്ത്യയിൽ നിന്നുള്ള സൈക്ലിസ്റ്റുകളുടെ അമേച്വർ മത്സരങ്ങളും സംഘടിപ്പിക്കും. ഇതിലെ വിജയികളെ എംടിബി കേരള അന്താരാഷ്ട്ര മത്സരത്തിൽ വിദേശ താരങ്ങളോടൊപ്പം മത്സരിപ്പിക്കും. മത്സരം നടക്കുന്ന അഞ്ച് കിലോമീറ്റർ നീളത്തിലുള്ള ട്രാക്ക് 3000 അടി ഉയരത്തിലാണ്. ചെളിയും പാറയും വെള്ളവും പോലെയുള്ള ഭൂപ്രദേശങ്ങളെ ഉൾക്കൊള്ളുന്ന ക്രോസ് കൺട്രി മത്സരവിഭാഗം ചാമ്പ്യൻഷിപ്പിലെ പ്രധാന ആകർഷണമാണ്. സ്വിറ്റ്സർലാന്റ് ആസ്ഥാനമായ സ്പോർട്സ് സൈക്ലിങ്ങിൻറെ ഭരണസമിതിയായ യൂണിയൻ സൈക്ലിസ്റ്റ് ഇൻറർനാഷണലിൻറെ എംടിബി ചാമ്പ്യൻഷിപ്പ് കലണ്ടറിൽ എംടിബി കേരള ഉൾപ്പെടുത്തിയിട്ടുണ്ട്. കെഎടിപിഎസ്, വയനാട് ഡിടിപിസി, സൈക്ലിങ് ഫെഡറേഷൻ ഓഫ് ഇന്ത്യ എന്നിവയുടെ നേതൃത്വത്തിലാണ് പരിപാടി സംഘടിപ്പിക്കുന്നത്.