പാലക്കാട് നിന്നും കാണാതായ രണ്ട് പെൺകുട്ടികളിൽ ഒരാളെ തിരുവനന്തപുരത്ത് കണ്ടെത്തി

തിരുവനന്തപുരം: പാലക്കാട് നിന്നും കാണാതായ രണ്ട് പെൺകുട്ടികളിൽ ഒരാളെ തിരുവനന്തപുരത്തു നിന്നും കണ്ടെത്തി. തിങ്കൾ ഉച്ചയ്ക്ക് ചന്ദ്രന​ഗറിൽ സർക്കാരിന്റെ കീഴിൽ പ്രവർത്തിക്കുന്ന സ്വകാര്യ സംരക്ഷണ കേന്ദ്രത്തിൽ നിന്നുമാണ് 16 വയസുള്ള പെൺകുട്ടികളെ കാണാതായത്. ഇരുവരും പോക്സോ കേസ് അതിജീവിതകളാണ്.

ഇതിൽ മങ്കര പൊലീസ് സ്റ്റേഷൻ പരിധിയിലുള്ള പോക്സോ കേസിലെ അതിജീവിതയെയാണ് തിരുവനന്തപുരം വഞ്ചിയൂർ ഭാ​ഗത്ത് നിന്നും കണ്ടെത്തിയത്. സംരക്ഷണ കേന്ദ്രത്തിൽ നിന്നും കടന്ന രണ്ടുപേരുടെയും കൈവശം ഫോൺ ഉണ്ടായിരുന്നുവെങ്കിലും സ്വിച്ച് ഓഫ് ചെയ്തനിലയിലായിരുന്നു. ഇതോടെ ട്രാക്ക് ചെയ്യാൻ കഴിയാതെയായി. തുടർന്ന് സിസിടിവി കേന്ദ്രീകരിച്ചാണ് അന്വേഷണം നടത്തി വന്നത്.

രണ്ടാമത്തെ കുട്ടി തമിഴ്നാട്ടിലേയ്ക്ക് കടന്നതായാണ് വിവരം. കഴിഞ്ഞ ദിവസങ്ങളിൽ പുറത്തുവന്ന സിസിടിവി ദൃശ്യങ്ങളിലും ഇതി ഉറപ്പിച്ചിരുന്നു. ഇപ്പോൾ കുട്ടി പൊള്ളാച്ചിയിലുള്ളതായാണ് റിപ്പോർട്ട്. പെൺകുട്ടി അതിജീവിതയായിട്ടുള്ള പോക്സോ കേസ് പ്രതി അടുത്തിടെ ജാമ്യത്തിൽ പുറത്തിറങ്ങിയിരുന്നു. യുവാവും നാട്ടിൽ ഇല്ല. ഇതോടെ ഈ യുവാവിനൊപ്പമായിരിക്കാം പെൺകുട്ടി പോയതെന്ന നി​ഗമനത്തിലാണ് പൊലീസ്. ഇതിന്റെ അടിസ്ഥാനത്തിൽ പൊലീസ് സംഘം പൊള്ളാച്ചിലേയ്ക്ക് തിരിച്ചു. കുട്ടിയെ കണ്ടെത്താൻ കഴിയുമെന്ന പ്രതീക്ഷയിലാണ് പൊലീസ്.

ഒരു മാസം മുൻപ് ഇതേ സംരക്ഷണ കേന്ദ്രത്തിൽ നിന്നും മൂന്ന് പെൺകുട്ടികളെ കാണാതെ പോയിരുന്നു. രണ്ടുപേർ സ്വമേധയാ തിരിച്ചെത്തിയെങ്കിലും മറ്റൊരു പെൺകുട്ടിയെ പൊലീസ് അന്വേഷിച്ചാണ് കണ്ടെത്തിയത്. കേന്ദ്രത്തിൽ നിന്നും പെൺകുട്ടികൾ കാണാതാകുന്നത് തുടർക്കഥയാകുന്ന സാഹചര്യത്തിൽ സുരക്ഷ വർധിപ്പിക്കണമെന്നാണ് ഉയരുന്ന ആവശ്യം.