പൊതുമരാമത്ത് പ്രവൃത്തികള്‍ക്ക്
 പുതിയ സാങ്കേതികവിദ്യ: മന്ത്രി റിയാസ്

തിരുവനന്തപുരം : പുതിയ സാങ്കേതികവിദ്യകളെക്കുറിച്ച് പഠിക്കുന്നതിന് വിപുലമായ സംവിധാനം പൊതുമരാമത്ത് വകുപ്പിനുണ്ടെന്നും ഗവേഷണങ്ങളുടെ തുടർഫലമായി നൂതന നിർമാണരീതികൾ കേരളത്തിലെ പ്രവൃത്തികളിൽ ഉൾപ്പെടുത്തുന്നുണ്ടെന്നും പൊതുമരാമത്ത് മന്ത്രി പി എ മുഹമ്മദ് റിയാസ് നിയമസഭയിൽ പറഞ്ഞു. തകർന്ന റോഡുകൾ പൊളിച്ചെടുത്ത് അതേ മെറ്റീരിയലുകൾതന്നെ നിർമാണത്തിന് ഉപയോഗിക്കുന്ന ഫുൾ ഡെപ്ത് റിക്ലമേഷൻ സംസ്ഥാന വ്യാപകമായി നടപ്പാക്കാൻ നടപടിയെടുത്തു. സിമന്റ് സ്റ്റെബിലൈസ്ഡ് സോയിൽ ഉപയോഗിച്ചുള്ള പുനഃചംക്രമണ റോഡ് നിർമാണം, നാച്വറൽ റബർ മോഡിഫൈഡ് ബിറ്റുമിൻ ഉപയോഗിച്ചുള്ള നിർമാണം, ഉപയോഗശൂന്യമായ പ്ലാസ്റ്റിക് ഉപയോഗിച്ചുള്ള റോഡ് നിർമാണം തുടങ്ങിയവ അതിൽ ചിലതാണ്.

കാലാവസ്ഥയെ അതിജീവിക്കാനും കൂടുതൽ കാലം ഈടുനിൽക്കാനും ഇത്തരം നിർമാണരീതികൾ സഹായകമാകുന്നുണ്ടെന്ന് മന്ത്രി പറഞ്ഞു. പാലങ്ങളുടെ നിർമാണത്തിലും നവീന സാങ്കേതികവിദ്യ ഉപയോഗപ്പെടുത്തുന്നു. നിർമാണ ചെലവ് കുറയ്‌ക്കാനാകുന്ന തരത്തിലുള്ള ഡിസൈനുകൾ ഉപയോഗപ്പെടുത്താനാണ് ശ്രമം. ആർക്കിടെക്ച്ചർ ഡിസൈൻ മേഖലയിൽ ആർട്ടിഫിഷ്യൽ ഇന്റലിജൻസ് ഉപയോഗപ്പെടുത്തുന്നത് പരിശോധിക്കുന്നുണ്ട്‌. കേരള ഹൈവേ റിസർച്ച് ഇൻസ്റ്റിറ്റ്യൂട്ടിനെ അന്താരാഷ്ട്ര നിലവാരത്തിൽ ഉയർത്താൻ പദ്ധതികൾ നടപ്പാക്കുകയാണ്. കാലാവസ്ഥാ വ്യതിയാനത്തിന്റെ ഫലമായി റോഡുകൾ തകരുന്നതിന്റെ കാരണം കണ്ടെത്താനും പ്രതിവിധികൾ നിർദേശിക്കുന്നതിനുമുള്ള ഗവേഷണം ആദ്യഘട്ടം വിജയകരമായി പൂർത്തിയാക്കി. തീരദേശ നിർമിതികളുടെ അതിജീവന കാലയളവ് മെച്ചപ്പെടുത്തുന്നതിനുള്ള പഠനം മദ്രാസ് ഐഐടിയുമായി സഹകരിച്ച് നടത്തുന്നുണ്ടെന്നും മന്ത്രി പറഞ്ഞു.