അവൾ ഇനി 'അവന' ! ആലപ്പുഴ അമ്മത്തൊട്ടിലിൽ പുതിയ അതിഥി

ആലപ്പുഴ: ആലപ്പുഴയിലെ അമ്മത്തൊട്ടിലിൽ വീണ്ടും ഒരു പെൺകുഞ്ഞ് കൂടി എത്തിയിരിക്കുന്നു. ഏഴ് ദിവസം പ്രായമുള്ള, പൂർണ്ണ ആരോഗ്യവതിയായ കുഞ്ഞിനെ ശിശുക്ഷേമ സമിതി ഏറ്റെടുത്തു. സ്ത്രീകളുടെയും കുട്ടികളുടെയും ആശുപത്രിക്ക് സമീപമുള്ള അമ്മത്തൊട്ടിലിലാണ് വീണ്ടും ഒരു പെൺകുഞ്ഞിനെ ലഭിച്ചത്.

വ്യാഴാഴ്ച പുലർച്ചെ 12:40-ഓടെയാണ് കുഞ്ഞിനെ അമ്മത്തൊട്ടിലിൽ ഉപേക്ഷിക്കപ്പെട്ട നിലയിൽ കണ്ടെത്തിയത്. ഏഴ് ദിവസം പ്രായമുള്ള കുഞ്ഞിന് 2.180 കിലോഗ്രാം തൂക്കമുണ്ട്. ശിശുക്ഷേമ സമിതി കുഞ്ഞിന് 'അവന' എന്ന് പേരിട്ടു. കുഞ്ഞ് തൊട്ടിലിലെത്തിയതോടെ ആശുപത്രി നഴ്സിങ് സ്റ്റേഷനിൽ അലാറം മുഴങ്ങുകയും ഉടൻ തന്നെ ഉദ്യോഗസ്ഥരെത്തി കുഞ്ഞിനെ ഏറ്റെടുക്കുകയും ചെയ്തു.

പ്രാഥമിക പരിശോധനകൾക്ക് ശേഷം കുഞ്ഞിനെ ഇന്റർ കെയർ യൂണിറ്റിലേക്ക് മാറ്റി. കുഞ്ഞ് ഇപ്പോൾ പൂർണ്ണ ആരോഗ്യവതിയായി തുടരുന്നു. ഇക്കഴിഞ്ഞ ഏപ്രിൽ മൂന്നിനും ഇവിടെ ഒരു പെൺകുഞ്ഞിനെ ലഭിച്ചിരുന്നു. ആ കുട്ടിക്ക് 'അദ്വൈക' എന്നാണ് പേര് നൽകിയത്. ഒരാഴ്ചയ്ക്കിടെ ഇത് രണ്ടാം തവണയാണ് ഇവിടെ കുഞ്ഞുങ്ങളെ ലഭിക്കുന്നത്.

കുഞ്ഞിന്റെ ദത്തെടുക്കൽ നടപടിക്രമങ്ങൾ ആരംഭിക്കുന്നതിന് മുന്നോടിയായി, അവകാശികൾ ആരെങ്കിലുമുണ്ടെങ്കിൽ സംസ്ഥാന ശിശുക്ഷേമ സമിതി അധികൃതരുമായി ബന്ധപ്പെടണമെന്ന് അറിയിച്ചിട്ടുണ്ട്. നിശ്ചിത സമയത്തിനുള്ളിൽ ആരും എത്തിയില്ലെങ്കിൽ കുഞ്ഞിനെ നിയമപരമായ ദത്തെടുക്കൽ നടപടികൾക്ക് വിധേയമാക്കും.