കൂടുതൽ ജലം കൊണ്ടുപോകണം: തമിഴ്‌നാടിന് കത്തയച്ച് മന്ത്രി റോഷി അഗസ്റ്റിൻ

തിരുവനന്തപുരം: മുല്ലപ്പെരിയാർ അണക്കെട്ടിൽ ജലനിരപ്പ് ഉയരുന്ന പശ്ചാത്തലത്തിൽ കൂടുതൽ ജലം കൊണ്ടുപോകണമെന്ന് ആവശ്യപ്പെട്ട് തമിഴ്‌നാടിന് കത്തയച്ചതായി മന്ത്രി റോഷി അഗസ്റ്റിൻ അറിയിച്ചു. ഇതേത്തുടർന്ന് ഇന്നലെ (വെള്ളിയാഴ്ച) മുതൽ തമിഴ്‌നാട് ടണൽ വഴി കൂടുതൽ ജലം കൊണ്ടുപോയി തുടങ്ങിയതായും മന്ത്രി അറിയിച്ചു.

വ്യാഴാഴ്ച വൈകിട്ട് 140.20 അടിയായിരുന്നു മുല്ലപ്പെരിയാറിലെ ജലനിരപ്പ്. പരമാവധി സംഭരണശേഷിയായ 142 അടിയാണ് റൂൾ കർവ് എങ്കിലും ജലനിരപ്പ് 140 അടിയിൽ നിലനിർത്തുന്നതിനായി കൂടുതൽ ജലം കൊണ്ടുപോകണമെന്നാണ് കേരളം ആവശ്യപ്പെട്ടത്. സംസ്ഥാനത്തിന്റെ ആവശ്യം അംഗീകരിച്ച തമിഴ്‌നാട് കൂടുതൽ ജലം കൊണ്ടുപോകുന്നതിനുള്ള നടപടി സ്വീകരിക്കുകയായിരുന്നു.

അപ്രതീക്ഷിതമായി മഴ പെയ്തു ജലനിരപ്പ് പെട്ടെന്ന് ഉയരാനുള്ള സാഹചര്യം തടയുന്നതിനാലാണ് കേരളം കത്തയച്ചത്. കൂടുതൽ ജലം കൊണ്ടുപോയി തുടങ്ങിയതോടെ ജലനിരപ്പ് 140 അടിയിലേക്ക് താഴുന്ന സ്ഥിതിയാണുള്ളത്. ഒക്ടോബർ 17ന് രാത്രിയിൽ പെയ്ത തീവ്ര മഴയിൽ 5 മണിക്കൂർ കൊണ്ട് നാലടിയിൽ അധികം ജലം ഉയർന്ന പശ്ചാത്തലത്തിൽ കൂടിയായിരുന്നു കേരളത്തിന്റെ നീക്കം. അന്ന് 132.90 അടിയിൽ നിന്ന് 137 അടിയായാണ് ജലനിരപ്പ് ഉയർന്നത്.