മലപ്പുറത്ത് ഒമ്പതാംക്ലാസുകാരിയെ പതിനാറുകാരൻ ക്രൂരമായി ബലാത്സംഗം ചെയ്‌ത ശേഷം കൊലപ്പെടുത്തി

മലപ്പുറം: മലപ്പുറം കരുവാരക്കുണ്ട്‌ തൊടിയപുലത്ത് ഒമ്പതാംക്ലാസ്‌ വിദ്യാർഥിയെ പതിനാറുകാരൻ ക്രൂരമായി ബലാത്സംഗം ചെയ്‌ത ശേഷം കൊലപ്പെടുത്തി. വ്യാഴാഴ്‌ച രാവിലെ സ്‌കൂളിലേയ്ക്ക് പോയ കുട്ടി വീട്ടിൽ തിരിച്ചെത്തിയിരുന്നില്ല. പൊലീസ്‌ അന്വേഷണം നടത്തുന്നതിനിടെയാണ്‌ വെള്ളി ഉച്ചയോടെ മൃതദേഹം റെയിൽവെ ട്രാക്കിന്‌ സമീപം കണ്ടെത്തിയത്‌.

പെൺകുട്ടിയുടെ ആൺസുഹൃത്തിനെ പൊലീസ് കസ്റ്റഡിയിലെടുത്തിരുന്നു. ചോദ്യം ചെയ്യലിൽ കുട്ടി കുറ്റം സമ്മതിച്ചു. പെൺകുട്ടിയുടെ ശരീരത്തിൽ നിരവധി മുറവികളുണ്ട്‌. കൈകൾ പിറകിലേക്ക്‌ കെട്ടിയ നിലയിലായിരുന്നു. ബലാത്സംഗത്തിന്‌ ശേഷം പെൺകുട്ടിയെ കഴുത്തുഞെരിച്ച്‌ കൊലപ്പെടുത്തുകയായിരുന്നുവെന്നാണ്‌ മൊഴി. സംഭവത്തിൽ മറ്റാർക്കെങ്കിലും പങ്കുണ്ടോ എന്ന കാര്യവും പൊലീസ്‌ അന്വേഷിക്കുന്നുണ്ട്‌.

വ്യാഴാഴ്‌ച സ്‌കൂളിൽ നിന്ന് തിരികെ വരാത്തതിനാൽ അമ്മ വൈകീട്ട്‌ കരുവാരക്കുണ്ട് പൊലീസ് സ്റ്റേഷനിൽ പരാതി നൽകിയിരുന്നു. സ്കൂളിന്റെ മുൻവശത്ത് കുട്ടി ബസിറങ്ങിയതായി പൊലീസ് സ്ഥിരീകരിച്ചെങ്കിലും പിന്നീട് എങ്ങോട്ടാണ് പോയതെന്നത് കണ്ടെത്താനായില്ല. കുട്ടിക്ക് പ്രായപൂർത്തിയാകാത്ത ആൺകുട്ടിയുമായി അടുപ്പമുണ്ടായിരുന്നതായി പൊലീസ് അന്വേഷണത്തിൽ മനസിലാക്കിയിരുന്നു. ഈ കുട്ടിയെ കസ്റ്റഡിയിലെടുത്ത് ചോദ്യം ചെയ്‌തെങ്കിലും പെൺകുട്ടിയെ കണ്ടില്ലെന്നായിരുന്നു മറുപടി. പൊലീസുകാരുടെയും നാട്ടുകാരുടെയും നേതൃത്വത്തിൽ തെരച്ചിൽ പുരോഗമിക്കുന്നതിനിടെയാണ്‌ മൃതദേഹം കണ്ടെത്തിയത്‌. തുടർന്ന്‌ പതിനാറുകാരനെ ചോദ്യം ചെയ്‌തതിൽ കുറ്റം സമ്മതിക്കുകയായിരുന്നു.