മെഡിസെപ്‌ തുടരും; മൂന്നുവർഷത്തിനിടെ നൽകിയത്‌ 1911 
കോടിയിലേറെ രൂപയുടെ ചികിത്സ

തിരുവനന്തപുരം: സർക്കാർ ജീവനക്കാർക്കും പെൻഷൻകാർക്കുമായി കേരള സർക്കാർ ഏർപ്പെടുത്തിയ മെഡിസെപ്‌ പദ്ധതി ആദ്യഘട്ടം പിന്നിട്ടപ്പോൾ ചികിത്സാനുകൂല്യമായി നൽകിയത്‌ 1911,21,86,500 രൂപ. 10,52,121 ബില്ലുകളിലൂടെയാണിത്‌. നിലവിൽ തീർപ്പാക്കാനുള്ളതുകൂടിയായാൽ 2051 കോടി രൂപയുടെ ചികിത്സാനുകൂല്യമാണ്‌ കൈവരിക്കുക.

മൂന്നുവർഷം പിന്നിട്ട പദ്ധതി തുടരണമെന്ന ജീവനക്കാരുടെയും പെൻഷൻകാരുടെയും ആവശ്യം പരിഗണിച്ച്‌ പരിഷ്‌കരിച്ച്‌ പുതുക്കാൻ സർക്കാർ തീരുമാനിച്ചിട്ടുണ്ട്‌. നിർദേശങ്ങൾ അംഗീകരിക്കപ്പെടുന്നതോടെ, വൈകാതെ പുതിയ ഇൻഷുറൻസ്‌ കമ്പനിയെ കണ്ടെത്തുന്നതുൾപ്പെടെയുള്ള നടപടിയിലേക്ക്‌ കടക്കും. മൂന്നുവർഷത്തെ പദ്ധതി ജൂൺ 30ന്‌ അവസാനിച്ചിരുന്നു. പുതിയത്‌ നടപ്പാകുന്നതുവരെ ആദ്യഘട്ടം നീട്ടിയിട്ടുണ്ട്‌. കാതലായ പരിഷ്‌കാരങ്ങളോടെയാണ്‌ പദ്ധതി തുടരുക.

പ്രീമിയത്തിൽ 50 ശതമാനം വർധന, ചികിത്സാനുകൂല്യം മൂന്നു ലക്ഷമെന്നത്‌ അഞ്ചു ലക്ഷമാക്കൽ, കൂടുതൽ ആശുപത്രികൾ, അവയമാറ്റ ശസ്‌ത്രക്രിയയുൾപ്പെടെയുള്ളവയ്‌ക്കായി കൂടുതൽ സഹായം തുടങ്ങി നിരവധി പരിഷ്‌കരണങ്ങളാണ്‌ ഡോ. ശ്രീറാം വെങ്കട്ടരാമൻ അധ്യക്ഷനായി രൂപീകരിച്ച സമിതി നിർദേശിച്ചത്‌. പദ്ധതി കാലാവധി രണ്ടുവർഷമായി ചുരുക്കാനും നിർദേശമുണ്ട്‌. രണ്ടാം വർഷം ഇൻഷുറൻസ്‌ പരിരക്ഷയിൽ അഞ്ച്‌ ശതമാനം വർധനവുണ്ടാകും. ശ്രീചിത്ര, ആർസിസി, മലബാർ ക്യാൻസർ സെന്റർ തുടങ്ങിയവയിലും മെഡിസെപ്‌ ഏർപ്പെടുത്താനും നിർദേശമുണ്ട്‌. ഇതിൽ സർക്കാർ തീരുമാനം ഉടനുണ്ടാകും.

ജീവനക്കാരും പെൻഷൻകാരും കുടുംബാംഗങ്ങളുമുൾപ്പെടെ 30,89,251 പേരാണ്‌ രാജ്യത്തിനു മാതൃകയായി ചികിത്സാ പദ്ധതിയിലുള്ളത്‌. പെൻഷൻകാർക്കും കുടുംബാംഗങ്ങൾക്കുമാണ്‌ ഇത്‌ ഏറെ പ്രയോജനപ്രദം. മുൻ മാതൃകകളില്ലാതെ തുടങ്ങിയ പദ്ധതിയായതിനാൽ തുടക്കത്തിൽ ചില പരാതികൾ ഉണ്ടായിരുന്നു. എങ്കിലും തുടരണമെന്ന്‌ ജീവനക്കാരും പെൻഷൻകാരും ആവശ്യപ്പെട്ടതിനെത്തുടർന്നാണ്‌ പദ്ധതി തുടരാൻ സർക്കാർ തീരുമാനിച്ചത്‌. ഓറിയന്റൽ ഇൻഷുറൻസ്‌ കമ്പനിയാണ്‌ മെഡിസെപ്പിന്റെ ഏജൻസി. മൂന്നുവർഷങ്ങളിലായി 1950 കോടിയിലേറെ രൂപയാണ്‌ പ്രീമിയമായി കമ്പനിക്കു നൽകിയത്‌.