ഉയര്‍ന്ന ജാതി അധിഷ്ഠിത ബോധമുള്ള സുരേഷ്‌ഗോപി പ്രസ്താവന പിന്‍വലിച്ചാല്‍ എന്ത് ഇല്ലെങ്കില്‍ എന്ത് :എം ബി രാജേഷ്

തിരുവനന്തപുരം> സുരേഷ് ഗോപിയുടെ പരാമര്‍ശം പരിഷ്‌കൃത സമൂഹത്തിന് യോജിച്ചതല്ലെന്ന് മന്ത്രി എം ബി രാജേഷ്. സുരേഷ് ഗോപി ജീര്‍ണിച്ച മനസ്സിന് ഉടമയാണെന്നും മുന്‍പും ഇത്തരം പരാമര്‍ശങ്ങള്‍ നടത്തിയിരുന്നുവെന്നും എം ബി രാജേഷ് പറഞ്ഞു.

ഉന്നത കുലത്തില്‍ ജനിക്കാത്തതില്‍ ദുഃഖിക്കുന്നയാളാണ് സുരേഷ് ഗോപി. ഉയര്‍ന്ന ജാതി അധിഷ്ഠിത ബോധമുള്ളയാളാണ് സുരേഷ്‌ഗോപി. അങ്ങനെയുള്ള വ്യക്തി പ്രസ്താവന പിന്‍വലിച്ചാല്‍ എന്ത്, പിന്‍വലിച്ചില്ലെങ്കില്‍ എന്ത് എന്നും എം ബി രാജേഷ് ചോദിച്ചു.

ബിജെപി ഭരിക്കുന്ന സംസ്ഥാനങ്ങളെക്കാള്‍ മുന്നിലായി പോയതിന്റെ ശിക്ഷയാണ് കേരളം അനുഭവിക്കുന്നതെന്ന് ജോര്‍ജ് കുര്യന്‍ തന്നെ സമ്മതിക്കുന്നുണ്ട്. കേരളം മുമ്പിലെത്തിയത് ബിജെപിയും അവരുടെ രാഷ്ട്രീയവും ഇവിടെ വേര് പിടിക്കാത്തത് കൊണ്ടാണെന്നും മന്ത്രി എം ബി രാജേഷ് പറഞ്ഞു.

കേരളം വികസനത്തില്‍ മുന്നിലെത്തിയതില്‍ അസൂയപ്പെട്ടിട്ട് കാര്യമില്ല. ബിജെപി ഭരിക്കുന്ന സംസ്ഥാനങ്ങളുടെ നിലയിലേക്ക് താഴാന്‍ കേരളം ഉദ്ദേശിക്കുന്നില്ലെന്നും അക്കാര്യം ജോര്‍ജ് കുര്യന്‍ മനസ്സിലാക്കേണ്ടതാണ് എന്നും എം ബി രാജേഷ് പ്രതികരിച്ചു.