print edition അരിയും പെൻഷനും മുടക്കാൻനോക്കി പണ്ടും

തിരുവനന്തപുരം

സാധാരണക്കാർക്കായി സർക്കാർ നടപ്പാക്കുന്ന ക്ഷേമപ്രവർത്തനങ്ങൾക്ക്‌ ആദ്യമായല്ല പ്രതിപക്ഷം പാരവയ്ക്കുന്നത്‌. 2021ൽ ഈസ്റ്റർ, വിഷു, റംസാൻ ഒന്നിച്ചുവരുന്ന സാഹചര്യം പരിഗണിച്ച്‌ അന്നത്തെ എൽഡിഎഫ്‌ സർക്കാർ മാർച്ച്, ഏപ്രിൽ മാസത്തിൽ കുറഞ്ഞ നിരക്കിൽ അരി നൽകാൻ തീരുമാനിച്ചിരുന്നു. 50 ലക്ഷം കുടുംബങ്ങൾക്ക്‌ പത്തു കിലോ അരി വീതം 15 രൂപയ്ക്ക്‌ നൽകാനായിരുന്നു തീരുമാനം.

കോവിഡ്‌ പശ്ചാത്തലത്തിൽ സംസ്ഥാനത്തെ 2.02 കോടി പേർക്ക് അവകാശപ്പെട്ട ആനുകൂല്യം ഇല്ലാതാക്കാനാണ്‌ യുഡിഎഫ്‌ ശ്രമിച്ചത്‌. അരിവിതരണം നിർത്തണമെന്നാവശ്യപ്പെട്ട്‌ പ്രതിപക്ഷ നേതാവായ രമേശ്‌ ചെന്നിത്തല തെരഞ്ഞെടുപ്പ്‌ കമീഷന്‌ കത്തുനൽകി. ക്ഷേമപെൻഷൻ വിതരണം നിർത്തിവയ്ക്കണമെന്നും എല്ലാ കുടുംബത്തിനും സർക്കാർ മാസംതോറും നൽകിവന്ന ഭക്ഷ്യക്കിറ്റും സ്‌കൂൾകുട്ടികൾക്കുള്ള അരിയും തടഞ്ഞുവയ്ക്കണമെന്നും‌ ചെന്നിത്തല ആവശ്യപ്പെട്ടു‌.

കത്തിനെതുടർന്ന്‌ തെരഞ്ഞെടുപ്പ്‌ കമീഷൻ അരിവിതരണം നിർത്താൻ ഉത്തരവിട്ടു. ഇതിനെതിരെ സർക്കാർ ഹൈക്കോടതിയിൽ ഹർജി നൽകി. തുടർന്ന്‌ ഹൈക്കോടതി തെരഞ്ഞെടുപ്പ്‌ കമീഷന്റെ ഉത്തരവ്‌ സ്റ്റേ ചെയ്യുകയായിരുന്നു. ഇതിനു സമാനമായാണ്‌ ഇപ്പോൾ സ്ത്രീകൾക്കുള്ള സുരക്ഷാപെൻഷൻ തടസ്സപ്പെടുത്താൻ യുഡിഎഫ്‌ ശ്രമിക്കുന്നത്‌.