'ഒൻപത്' മാറി 'ഒൻപ്' ആകണം; മലയാളത്തിലെ അക്കപ്പേരുകളിലെ ആശയക്കുഴപ്പം

'ഒൻപത് '... 'ഒൻപ് '

9 എന്ന അക്കത്തെ സൂചിപ്പിക്കുന്ന 'ഒൻപത്' എന്ന മലയാള വാക്ക്‌ വലിയ ആശയക്കുഴപ്പം സൃഷ്ടിക്കുന്നതാണ്, കുട്ടികൾക്ക് മാത്രമല്ല, വലിയവർക്കും.

പത്തിൽ ഒന്ന് കുറവ് എന്ന അർത്ഥത്തിലായിരിക്കണം ഒരു പക്ഷെ ഒൻപത് എന്ന വാക്കിന്റെ ഉത്ഭവം. എന്നാൽ അത് സൃഷ്ടിക്കുന്ന പ്രശ്നങ്ങൾ ചെറുതല്ല. പ്രത്യേകിച്ച് ചെറു ക്ലാസ്സുകളിൽ പഠിക്കുന്ന കൊച്ചു കുട്ടികൾക്കും, പഠിപ്പിക്കുന്ന അദ്ധ്യാപകർക്കും. (അദ്ധ്യാപകനായപ്പോഴത്തെ അനുഭവം ഓർമ വരുന്നു).

90 നെ സൂചിപ്പിക്കുന്ന തൊണ്ണൂറ് എന്ന വാക്ക് കേൾക്കുമ്പോൾ ഒൻപത് നൂറായ 900 ആണ് മനസ്സിൽ വരിക. 900 നെ സൂചിപ്പിക്കുന്ന തൊള്ളായിരം എന്ന വാക്ക് 9 ആയിരത്തെ ഓർമപ്പെടുത്തുന്നു. ഒൻപത് വരുന്ന അക്കങ്ങളിലാണ് ഈ പ്രത്യേകത.

താഴെ കൊടുത്ത വാക്കുകൾ നോക്കുക :

10 (പത്ത്), 20 (ഇരുപത്), 30 (മുപ്പത്), 40 (നാൽപ്പത്), 50 (അൻപത്), 60 (അറുപത്), 70 (എഴുപത്), 80 (എൺപത്), 90 ആകുമ്പോൾ അത് തൊണ്ണൂറാകുന്നു.

100 (നൂറ്), 200 (ഇരുന്നൂറ്‌), 300 (മുന്നൂറ്‌), 400 (നാനൂറു), 500 (അഞ്ഞൂറ്), 600 (അറുന്നൂറു), 700 (എഴുന്നൂറു), 800 (എണ്ണൂറ്) കഴിഞ്ഞു 900 ആകുമ്പോൾ തൊള്ളായിരമാകുന്നു. കാരണം പത്തുമായുള്ള ബന്ധം 'ഒൻപതി'ൽ വന്നു കഴിഞ്ഞിരിക്കുന്നു.

ഈ പ്രത്യേകത പത്തൊമ്പത്, ഇരുപത്തൊമ്പത് തുടങ്ങിയ വാക്കുകളിലുമുണ്ട്. അതായത് പത്തു ഒൻപതെന്നും ഇരുപതു ഒൻപതെന്നുമുള്ള സൂചന.

9 എന്ന അക്കത്തിന്നുള്ള വാക്ക് 'ഒൻപതി'ന്നു പകരം 'ഒൻപ് ' എന്നാണെങ്കിൽ ഇങ്ങനെയിരിക്കും :

1 ( ഒന്ന്), 2 (രണ്ട്) 3 (മൂന്ന് ), 4 (നാല്), 5 (അഞ്ച്), 6 (ആറ്), 7 ( ഏഴ്), 8 ( എട്ട് ), 9 ( ഒൻപ് ).

10 (പത്ത്), 20 (ഇരുപത്), 30 (മുപ്പത്), 40 (നാല്പത്), 50 (അൻപത്), 60 (അറുപത്), 70 (എഴുപത് ), 80 ( എൺപത് ) 90 (ഒൻപത് ).

100 ((നൂറ്)), 200 (ഇരുന്നൂറ്‌), 300 (മുന്നൂറ്‌)), 400 (നാനൂറ്‌), 500 (അഞ്ഞൂറ്), 600 (അറുന്നൂറ്‌), 700 ( എഴുനൂറ് ), 800 ( എണ്ണൂറ് ) 900 ( തൊണ്ണൂറ് ).

1000 (ആയിരം), 2000 (രണ്ടായിരം), 3000 (മൂവായിരം), 4000 (നാലായിരം), 5000 (അയ്യായിരം), 6000 (ആറായിരം), 7000 ( ഏഴായിരം ) 8000 ( എണ്ണായിരം ), 9000 ( ഒൻപായിരം ).

11 (പതിനൊന്ന്), 12 (പന്ത്രണ്ട്), 13 (പതിമൂന്ന്), 14 ((പതിനാല്), 15 (പതിനഞ്ച്), 16 (പതിനാറ്), 17 ( പതിനേഴ് ) 18 ( പതിനെട്ട് ) 19 (പത്തൊൻപ് ).

21 (ഇരുപത്തൊന്ന്), 22 (ഇരുപത്തി രണ്ട്), 23 (ഇരുപത്തിമൂന്ന്), 24 (ഇരുപത്തിനാല്), 25 (ഇരുപത്തിയഞ്ച്), 26 (ഇരുപത്തിയാറ്), 27 ( ഇരുപത്തേഴ്‌ ), 28 ( ഇരുപത്തെട്ട് ) 29 ( ഇരുപത്തൊൻപ് ).

ഈ രീതിയിൽ 9 ന്ന് ' ഒൻപ് ' എന്ന വാക്ക് ഉപയോഗിച്ചാൽ ആശയകുഴപ്പം ഒഴിവാക്കാൻ കഴിയും. അക്കങ്ങൾ തമ്മിൽ ഐക്യരൂപവുമുണ്ടാകും.

രാജ്യങ്ങളുടെയും, നഗരങ്ങളുടെയും, നദികളുടെയും, സ്മാരകങ്ങളുടെയും, വ്യക്തികളുടേയും, അളവുകളുടെയും ( റാത്തൽ - കിലോ ), ദൂരത്തിന്റെയും ( ഇഞ്ച് - സെന്റിമീറ്റർ ), ( നാഴിക - കിലോമീറ്റർ ) മറ്റും പേരുകൾ ആവശ്യമായും അല്ലാതെയും മാറ്റിക്കൊണ്ടിരിക്കുന്ന കാലമാണ് ഇപ്പോൾ. ഏറ്റവും സൗകര്യമുള്ളതും ഉചിതവും 'ഒൻപത് ' എന്ന പദത്തെ 'ഒൻപ് ' എന്നാക്കി മാറ്റുന്നത്. ഈ അഭിപ്രായം പുതിയതൊന്നുമല്ല താനും.

വിദ്യാഭ്യാസ വിചക്ഷണരും ഗണിത ശാസ്ത്ര വിദഗ്ധരും സർക്കാരും ഈ കാര്യങ്ങൾ ചർച്ച ചെയ്തു ആവശ്യമായ തീരുമാനമെടുത്താൽ നന്നായിരിക്കുമെന്ന അഭിപ്രായമുണ്ട്.

പന്ത്രണ്ടോ അല്ല പതിരണ്ടോ?

ക്യൂ നിൽക്കുന്നതിന്നിടയിൽ നിന്നും അക്ഷമരായി ചിലർ വരിയിൽ നിന്നും അപ്പുറവും ഇപ്പുറവും മാറി മുന്നോട്ട് നോക്കുന്നത് കാണാം. അത്തരത്തിലൊരു തിരക്കുകാരനാണ് പന്ത്രണ്ട് ( 12 ).

പതിനൊന്നു (11), പതിമൂന്ന് ( 13), പതിനാല് (14), പതിനഞ്ച് (15), പതിനാറ് ( 16 ), പതിനേഴ് (17), പതിനെട്ട് (18), പത്തൊമ്പത് (19) എല്ലാം നാല് അക്ഷരത്തിൽ നിൽക്കുമ്പോൾ അത് ചുരുക്കി മൂന്ന് അക്ഷരത്തിൽ തിരക്ക് പിടിച്ചു നിൽക്കുകയാണ് പന്ത്രണ്ട് ( 12 ). മുൻപ് പതിരണ്ട് എന്നുള്ളത് ക്രമത്തിൽ പന്ത്രണ്ട് ആയതാവാനും സാധ്യതയുണ്ട്.

ഇരുപത്തി രണ്ട് (22), മുപ്പത്തിരണ്ട് (32), തുടങ്ങിയ വാക്കുകളിലൊന്നും ഈ തിരക്കില്ല. മറ്റു വാക്കുകളെ പോലെ തന്നെയാണ്.