print edition ഇന്ന്‌ 
മകരവിളക്ക്‌ ; പകൽ 2.45ന് നട തുറക്കും

ശബരിമല

​ശബരിമലയിൽ മകരവിളക്കും മകരസംക്രമ പൂജയും ബുധനാഴ്‌ച നടക്കും. ബുധൻ പകൽ 3.08നാണ്‌ മകര സംക്രമപൂജ. പകൽ 2.45ന് നട തുറക്കും. പന്തളം കൊട്ടാരത്തിൽനിന്ന്‌ കൊണ്ടുവരുന്ന തിരുവാഭരണം ചാർത്തി വൈകിട്ട് 6.40നാണ് ദീപാരാധന. ഈ സമയം പൊന്നമ്പലമേട്ടിൽ മകരവിളക്ക്‌ തെളിക്കും.

വൈകിട്ട് 6.20ന്‌ തിരുവാഭരണ വാഹകസംഘത്തെ ദേവസ്വംമന്ത്രി വി എൻ വാസവൻ, തിരുവിതാംകൂർ ദേവസ്വം ബോർഡ് പ്രസിഡന്റ്‌ കെ ജയകുമാർ, അംഗങ്ങളായ പി ഡി സന്തോഷ് കുമാർ, കെ രാജു തുടങ്ങിയവർ സ്വീകരിക്കും. സോപാനത്ത് തിരുവാഭരണ പേടകം തന്ത്രി കണ്ഠര് മഹേഷ് മോഹനര്, മേൽശാന്തി ഇ ഡി പ്രസാദ് നമ്പൂതിരി എന്നിവർ ഏറ്റുവാങ്ങും.

ഹൈക്കോടതി ഉത്തരവ്‌ പ്രകാരം മകരവിളക്ക്‌ ദിവസം 35,000 പേർക്കാണ്‌ സന്നിധാനത്തേക്ക്‌ പ്രവേശനം. മകരവിളക്ക്‌ ദർശിച്ച്‌ മടങ്ങുന്നവർക്ക്‌ ആയിരം കെഎസ്‌ആർടിസി ബസ്‌ അടക്കം വിപുലമായ ക്രമീകരണമാണ്‌ ഒരുക്കിയിട്ടുള്ളത്‌.