അമ്പൂരിയിൽ നിന്ന് മയക്കുവെടി വച്ച് പിടികൂടിയ പുലി ചത്ത നിലയിൽ

തിരുവനന്തപുരം: അമ്പൂരിയിൽ മയക്കുവെടി വച്ച് പിടികൂടിയ പുലി ചത്ത നിലയിൽ. പുലിയെ നെയ്യാർ ഡാമിലെ സഫാരി പാർക്കിലേക്ക്‌ മാറ്റിയിരുന്നു. ഇന്ന് ഉച്ചയോടെയാണ് കൂട്ടിൽ പുലിയെ ചത്ത നിലയിൽ കണ്ടെത്തിയത്.

അമ്പൂരിയിൽ ചാക്കപ്പാറ കാരിക്കുഴിയിൽ സ്വകാര്യ വ്യക്തിയുടെ പുരയിടത്തിൽ നിന്നാണ് പുലിയെ പിടികൂടിയത്. പുലിയെ വള്ളിയിൽ കുടുങ്ങിയനിലയിൽ കണ്ടതായി റബർ ടാപ്പിങ്‌ നടത്തുകയായിരുന്നയാളാണ് വനം വകുപ്പിനെ അറിയിച്ചത്.

തുടർന്ന് നെയ്യാർഡാം, വെള്ളറട പൊലീസും പരുത്തിപ്പള്ളി ആർആർടി സംഘവും, നെയ്യാർ റേഞ്ച് വനം ഉദ്യോഗസ്ഥരും ഉൾപ്പെടെ സ്ഥലത്തെത്തി. വനംവകുപ്പ് വെറ്റിനറി ഡോക്ടർ അരുൺ മയക്കുവെടിവച്ച്‌ പുലിയെ പിടികൂടുകയായിരുന്നു.

കമ്പുകൊണ്ട് പുലിയുടെ വയറിന്റെ ഭാഗത്ത് പരിക്കേറ്റ പുലിയെ ചികിത്സയ്ക്കായി നെയ്യാർ ഡാമിലെ സഫാരി പാർക്കിലേക്ക്‌ മാറ്റുകയായിരുന്നു. പുലിക്ക് നാല് വയസോളം പ്രായമുണ്ട്.