കെഎസ്ആർടിസി യാത്രികര്‍ക്ക് സന്തോഷ വാർത്ത ! കിടിലൻ സർവീസുകളുമായി ബിസിനസ് ക്ലാസ് ബസുകൾ ഉടനെത്തും

തിരുവനന്തപുരം: കെഎസ്ആർടിസി യാത്രക്കാര്‍ക്ക് സന്തോഷവാർത്തയുമായി മന്ത്രി കെ ബി ​ഗണേഷ് കുമാർ. കെഎസ്ആർടിസി ബിസിനസ് ക്ലാസ് ബസുകൾ ഉടന്‍ സർവീസ് ആരംഭിക്കുമെന്ന് മന്ത്രി അറിയിച്ചു. പാൻട്രി, ടോയ്‌ലറ്റ് സൗകര്യങ്ങളോട് കൂടിയ ബസുകളായിരിക്കും ബിസിനസ് ക്ലാസ്സിൽ വരികയെന്നും മന്ത്രി പറഞ്ഞു.

തിരുവനന്തപുരം – കൊച്ചി റൂട്ടിൽ സർവീസ് നടത്തുന്ന ബസിൽ ടിക്കറ്റ് റിസർവ് ചെയ്യുന്നതിനോടൊപ്പം തന്നെ യാത്രക്കാർക്ക് ഭക്ഷണവും ബുക്ക് ചെയ്യാനുള്ള സൗകര്യമുണ്ടാകുമെന്നും മന്ത്രി അറിയിച്ചു. ഡ്രൈവർക്ക് പുറമെ ഒരു ഹോസ്റ്റസ് മാത്രമായിരിക്കും ജീവനക്കാരായി ബസിലുണ്ടാവുകയെന്നും അദ്ദേഹം കൂട്ടിച്ചേർത്തു.

ഈ മാസം 15-ഓടെ ആദ്യ ബസ് എത്തുമെന്നും വിമാനങ്ങളിലെ എയർ ഹോസ്റ്റസുമാർക്ക് സമാനമായി യാത്രക്കാരെ സഹായിക്കാൻ ബസ് ഹോസ്റ്റസുമാർ ബസിലുണ്ടാകുമെന്നും മന്ത്രി വ്യക്തമാക്കി. ബസ് എത്തിക്കഴിഞ്ഞാൽ താൻ തന്നെ അത് ഓടിച്ചു നോക്കിയ ശേഷം സർവീസ് ആരംഭിക്കുമെന്നാണ് മന്ത്രിയുടെ പ്രഖ്യാപനം.

നവീകരിച്ച എറണാകുളം കെ എസ് ആർ ടി സി സ്റ്റാൻഡിന്റെ ഉദ്ഘാടന വേദിയിൽ വെച്ചാണ് മന്ത്രി പ്രഖ്യാപനം നടത്തിയത്. തെരഞ്ഞെടുപ്പ് ചട്ടം നിലവിൽ വന്നാൽ ഔദ്യോഗിക ഉദ്ഘാടനം നടത്താൻ സാധിക്കില്ലെന്നും അതിനാലാണ് ബസ് എത്തുന്നതിന് മുൻപേ ഇപ്പോൾ ഉദ്ഘാടന പ്രഖ്യാപനം നടത്തിയതെന്നും മന്ത്രി പറഞ്ഞു.