കോഴിക്കോട് ആനക്കൊമ്പ് കടത്ത്: അഞ്ച് പേർ പിടിയിൽ

കോഴിക്കോട്: കോഴിക്കോട് ആനക്കൊമ്പ് കടത്ത് സംഘത്തിലെ അഞ്ച് പേർ പിടിയിൽ. കക്കോടി പാലം ഭാ​ഗത്ത് നിന്നാണ് പ്രതികളെ വനംവകുപ്പ് പിടികൂടിയത്. ആനക്കൊമ്പും കസ്റ്റഡിയിലെടുത്തു. കോഴിക്കോട് സ്വ​ദേശികളായ ദിൽഷാദ്, പരീദ്, വിൻസന്റ്, അസീൽ, മുഹമ്മദ് റിഫാൻ എന്നിവരാണ് പിടിയിലായതെന്നാണ് വിവരം.

വനം വകുപ്പിന് ലഭിച്ച രഹസ്യ വിവരത്തിന്റെ അടിസ്ഥാനത്തിലായിരുന്നു പരിശോധന നടത്തിയത്. കോഴിക്കോട് ഫ്ലൈയിങ് സ്ക്വാഡും താമരശേരി റേഞ്ച് ഉദ്യോ​ഗസ്ഥരും സംയുക്തമായി നടത്തിയ ഓപ്പറേഷനിൽ കക്കോടിയിലെ ഒരു വീട്ടിൽ നിന്ന് ആനക്കൊമ്പ് കണ്ടെത്തുകയായിരുന്നു.12 കിലോ ഭാരമുള്ള ആനക്കൊമ്പാണ് കണ്ടെത്തിയത്. ആനക്കൊമ്പ് എവിടെനിന്നാണ് കോഴിക്കോട്ടെത്തിച്ചതെന്ന കാര്യത്തിൽ വ്യക്തതയില്ല. അന്വേഷണം പുരോ​ഗമിക്കുകയാണ്.