പൊതുവിദ്യാലയങ്ങളിൽ 40,906 കുട്ടികൾ വർധിച്ചു: ഒന്നാം ക്ലാസിൽ പ്രവേശനം നേടിയത് 2,34,476 പേർ

തിരുവനന്തപുരം: സംസ്ഥാനത്തെ പൊതുവിദ്യാലയങ്ങളിലെ രണ്ടു മുതൽ 10 വരെ ക്ലാസുകളിലെ കുട്ടികളുടെ എണ്ണത്തിൽ 40,906 പേരുടെ വർധന. ആറാം പ്രവൃത്തി ദിനത്തിലെ കണക്കനുസരിച്ചാണിത്‌.

ഈ വർഷം സർക്കാർ, എയ്‌ഡഡ് സ്‌കൂളുകളിലായി രണ്ടു മുതൽ 10 വരെ ക്ലാസുകളിൽ 29,27,513 കുട്ടികളാണ്‌ ഉള്ളത്‌. കഴിഞ്ഞ വർഷം ഇത്‌ 28,86,607 ആയിരുന്നു.

ഒന്നാം ക്ലാസിൽ 2,34,476 പേർ പ്രവേശനം നേടി. കഴിഞ്ഞ വർഷം 2,50,986 പേർ ഒന്നാം ക്ലാസിൽ ചേർന്നിരുന്നു. ഒന്നിൽ പ്രവേശനം നേടിയവരിൽ 16,510 കുട്ടികളുടെ കുറവുണ്ട്.

2010ൽ ജനിച്ച കുട്ടികളാണ് 2025ൽ പത്താം ക്ലാസ്സ് പൂർത്തിയാക്കിയത്. 2010ലെ ജനന നിരക്ക് 15.75 ആണ്‌. 2020ൽ ജനിച്ച കുട്ടികളാണ് ഈ അധ്യയന വർഷം ഒന്നിൽ പ്രവേശനം നേടിയത്‌.

2020ലെ ജനന നിരക്ക് 12.77 ആണ്. ജനനനിരക്കിൽ 2.98 ശതമാനത്തിന്റെ കുറവുണ്ടായി. ഇതാണ് ഒന്നാം ക്ലാസിൽ ചേർന്നവരുടെ എണ്ണത്തിൽ കുറവുണ്ടാകാൻ കാരണമെന്ന്‌ മന്ത്രി വി ശിവൻകുട്ടി പറഞ്ഞു.

അൺ എയ്‌ഡഡ് മേഖലയിൽ ഇത്തവണ ഒന്നാം ക്ലാസ്സിൽ ചേർന്നത് 47,863 കുട്ടികൾ ആണ്. കഴിഞ്ഞ വർഷത്തേക്കാൾ അധികമായി ഒരു കുട്ടിമാത്രമാണ്‌ അൺ എയ്‌ഡഡ് സ്‌കൂളുകളിൽ ഒന്നാം ക്ലാസിൽ എത്തിയതെന്ന്‌ മന്ത്രി പറഞ്ഞു.